Qazaqstanda zańgerlik keńes berý úshin jasandy ıntellekt ázirlenip jatyr

ALMATY. KAZINFORM — Aldaǵy ýaqytta zańgerlik keńesti jasandy ıntellektten alýǵa bolady.

Bul týraly óńirlik kommýnıkatsııalar qyzmetinde ótken baspasóz máslıhatynda Ádilet departamentiniń basshysy Balaıym Kesebaeva málimdedi.

Spıkerdiń sózinshe, Ádilet mınıstrligi quqyqtyq qyzmetterdiń sapasy men qoljetimdiligin arttyrýǵa baǵyttalǵan «Digital Justice» bastamasy aıasynda birqatar jobany júzege asyryp jatyr.

— Mańyzdy sheshimderdiń biri — «E-ZanKomegi» biryńǵaı quqyqtyq kómek kórsetý aqparattyq júıesin qurý boldy. Bul júıe qazirdiń ózinde 1949 advokat pen zańgerlik keńesshilerdi biriktiredi. 2023-2024 jyldary platforma arqyly 88 738 is óńdelip, portal qoldanýshylarynyń sany 6 749 adamǵa jetti. Azamattardyń yńǵaılylyǵy úshin «beıneqońyraý» fýnktsııasy iske qosyldy, bul quqyqtyq qyzmet operatorlarynan táýlik boıy keńes alýǵa múmkindik beredi. Buǵan qosa, jasandy ıntellekt elementteri bar chat-bot synaqtan ótip jatyr, — dedi ol.

Jańa JI árbir ótinishtiń erekshelikterin eskerip, paıdalanýshylarǵa jeke usynystar beredi.

— Ádilet mınıstrligi zań qyzmetterin kórsetýge arnalǵan platformalardy ázirleıtin eldegi jetekshi IT-kompanııalar men ýnıversıtetter ókilderinen jumys tobyn qurdy, — dep atap ótti Kesebaeva.

Budan bólek, Halyqqa qyzmet kórsetý ortalyqtaryna (HQKO) uqsas «zań klınıkalaryn» ashý josparda, onda azamattar tegin zańgerlik kómek ala alady.

Osyǵan deıin aqmolalyqtar tsıfrlyq sot oryndaýshysynyń arqasynda 82 mln teńgege jýyq qarajattaryn únemdegeni týraly jazǵan edik.