Qazaqstanda zańdy tulǵalardyń bankrottyǵy rásimi jańartyldy
ASTANA. KAZINFORM — 19 naýryzdan bastap zańdy tulǵalardyń bankrottyq rásimderiniń ashyqtyǵyn arttyrýǵa baǵyttalǵan túzetýler engizildi, dep habarlaıdy Memlekettik kirister komıtetiniń baspasóz qyzmeti.
2026 jyldyń 16 qańtarynda «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly» jáne «Ońaltý jáne bankrottyq týraly» Qazaqstan Respýblıkasynyń zańdaryna túzetýlerge qol qoıyldy.
Sońǵy birneshe jyldar ishinde zańdy tulǵalar bankrottyǵy salasy aıtarlyqtaı ózgeristerge ushyramaǵan edi. Alaıda, bul saladaǵy quqyqtyq qatynastardyń úrdisi rásimder tıimdiligin joǵarylatý boıynsha kezekti qadamnyń qajettiligin kórsetti. Bul rette rásimge qatysýshylar yńǵaılylyǵy úshin tıisti túzetýler kezeń-kezeńmen engiziledi.
Sonymen, 2026 jyldyń 19 naýryzynan bastap kelesilerdi:
— bankrottyqty basqarýshyǵa qosymsha quqyqtar berýdi (qosymsha syıaqyny esepteý kezinde jáne zańdy tulǵany qaıta tirkeýdi jaramsyz dep taný úshin sotqa júginý boıynsha);
— ýaqytsha basqarýshyny shettetý fýnktsııasyn engizýdi;
— kredıtorlar jınalysy/komıteti otyrysy týraly kredıtorlardy habarlandyrý tásilderin keńeıtýdi;
— aldyndaǵy bas tartýdan keıin bankrot dep taný týraly ótinishpen qaıta júginý merzimin belgileýdi;
— salyqtardy jáne basqa da mindetti tólemderdi tóleý boıynsha kredıtordan basqa ózge kredıtorlar bolmaǵan jaǵdaıda ońaltý rásimin qoldanýǵa jol bermeýdi;
— bankrottyń múlkin tikeleı satý kezinde kredıtorlar jınalysynyń ókilettiligin anyqtaýdy kózdeıtin túzetýler qoldanysqa engiziledi.
— Atalǵan ózgerister ońaltý jáne bankrottyq rásimderin josyqsyz paıdalaný talpynystaryn azaıtýǵa múmkindik beredi jáne olardyń ashyqtyǵyn joǵarylatady dep kútiledi. Óz kezeginde, bul baǵyttaǵy jumys aıaqtalǵan joq. Búginde ákimshilerdiń deńgeıin joǵarylatýǵa jáne kredıtorlardyń quqyqtaryn keńeıtýge baǵyttalǵan «Ońaltý jáne bankrottyq týraly» Zańǵa túzetýler Qazaqstan Respýblıkasy Parlamentiniń Májilisi qaralýynda, — delingen habarlamada.
Osyǵan deıin lombardtar aldyndaǵy qaryz endi sottan tys bankrottyqqa kedergi bolmaıtynyn jazǵanbyz.
