Qazaqstanda zań júzinde dári-dármek baǵalaryna shekteý qoıylatyn bolady
ASTANA. QazAqparat - Qazaqstanda zań júzinde dári-dármek baǵalaryna shekteý qoıylatyn bolady. Bul týraly búgin QR Parlamenti Senatynda Qazaqstan Respýblıkasy Densaýlyq saqtaý mınıstrliginiӊ jaýapty hatshysy Bolat Tókejanov málim etti, dep habarlaıdy QazAqparat.
«Qazaqstan Prezıdenti Nursultan Nazarbaev usynǵan "Qazaqstannyń úshinshi jańǵyrýy: jahandyq básekege qabilettilik" atty Joldaýynda Densaýlyq saqtaý mınıstrligine dári-dármek baǵalaryn retteýdiń jańa ádisterine kóshýdi tapsyrǵan bolatyn. Osyǵan baılanysty Densaýlyq saqtaý mınıstrligi «Dári-dármek quraldarynyń baǵalaryn retteý týral» zań jobasynyń tujyrymdamasyn jasaqtady. Barlyq dárilerdiń qunyn retteýge baǵyttalǵan zań jobasyn biz bıyl tamyz aıynda Parlamentke engizemiz. Qazir Densaýlyq saqtaý mınıstrligi tek kepildendirilgen tegin medıtsınalyq qyzmet kórsetý baǵdarlamasy aıasynda qoldanylatyn dárilerdiń baǵasyn ǵana bekitetin bolsa, zań jobasy engizilgen jaǵdaıda baǵany retteý barlyq dári-dármekterge taralatyn bolady. Sonymen qatar baǵa retteýdiń jańa sheshimderi jasaqtalyp jatyr», - dep atap ótti jaýapty hatshy.
Aıta ketý kerek, Qazaqstanda búginde dári-dármekterdiń ulttyq formýlıary jasaqtaldy. Bunyń aldynda, QR Densaýlyq saqtaý mınıstrliginiń Farmatsııa komıteti QazAqparattyń resmı saýalyna oraı QR Parlamenti Májilisiniń depýtaty Záýresh Amanjolovanyń dárihanalardaǵy dári baǵasynyń qymbattyǵyna qatysty synyna jaýap bergen bolatyn .
Onda QR Densaýlyq saqtaý mınıstrligi búkil dárilerdiń baǵasyn retteý úshin farmatsevtıka qoǵamdastyǵynyń ókilderimen birge barlyq dárilik zattardyń shekti baǵasyn qalyptastyrý ádistemesin talqylaý jumysyn júrgizip jatqandyǵy týraly habarlanǵan edi.
