Qazaqstanda zań jobalaryn ashyq talqylaýǵa arnalǵan portal jumysyn bastady

ASTANA. QazAqparat - «100 naqty qadam» - Ult josparynyń 94-shi qadamy men Qazaqstannyń ashyq úkimetin damytý baǵdarlamalarynyń aıasynda «Ashyq normatıvti quqyqtyq aktiler (NQA)» legalacts.egov.kz portalynda ashyq talqylaýǵa arnalǵan zań jobalary jarııalanǵan.

Qazirgi tańda azamattar «Turǵyn úı qatynastary týraly» QR Zańyna ózgerister men tolyqtyrýlar engizý týraly», «Jarnama týraly» QR-nyń keıbir zańnamalyq aktilerine ózgerister men tolyqtyrýlar engizý týraly» jáne «Standarttaý týraly» zań jobalary boıynsha óz oı-pikirlerin bildire alady», dep habarlaıdy «Ulttyq aqparattyq tehnologııalar» AQ-nyń baspasóz-qyzmeti.

Buǵan qosa, 10 sáýirge deıin portalda «Salyq jáne bıýdjetke tólenetin basqa da mindetti tólemder jóninde, sondaı-aq kedendik retteý týraly» kodeks jobasy tujyrymdamasy qoǵamdyq talqylaýǵa usynylady.

«Ashyq NQA» portaly - azamattarǵa qoǵamdyq bastamalardy, normatıvti quqyqtyq aktilerdi jáne memlekettik organdar sheshimderin qarastyrý úrdisine qatysýyn qamtamasyz etedi. Dálirek aıtqanda, múddeli organ bekitpes buryn ázirleýshi organdar jobalardy qoǵamdyq talqylaýǵa  portalǵa ornalastyrady. Talqylaý nátıjeleri de  sol portalda jarııalanady.

Buǵan deıin, memlekettik qyzmetter talqylaýy elektrondyq úkimet aıasynda eGov portalynda ótken bolsa, qazirgi tańda, «Aqparatqa qoljetimdilik» zańynyń qabyldanýy arqasynda barlyq zań jobalarynyń tujyrymdamalary, NQA jobalary men memlekettik qyzmettiń standarttary mindetti túrde «Ashyq NQA» ınternet-portalynda qoǵamdyq talqylaýdan ótedi.