Qazaqstanda zań konsýltanttary men advokattardyń qyzmeti avtomattandyrylady
Atap aıtqanda, «Advokattyq qyzmet jáne zań kómegi týraly» Zańyn iske asyrý maqsatynda «Ulttyq aqparattyq tehnologııalar» AQ jáne Zań konsýltanttary palatalarynyń qaýymdastyǵymen «E-Zań kómegi» Zań kómeginiń biryńǵaı aqparattyq júıesi» qyzmet kórsetý kelisimshartyna qol qoıyldy.
«Kelisimshart aıasynda «E-Zań kómegi» júıesin QR Joǵarǵy soty, Bas prokýratýra, Ádilet, Іshki ister, Bilim jáne ǵylym, Densaýlyq saqtaý mınıstrlikteriniń, «Biryńǵaı jınaqtaýshy zeınetaqy qory» AQ-nyń, sondaı-aq «Baǵaly qaǵazdardyń biryńǵaı tirkeýshisi» AQ-nyń aqparattyq júıelerimen yqpaldastyrý boıynsha jumystar júzege asyrylatyn bolady», - delingen vedomstvonyń málimetinde.
Aıta ketý kerek, qazirgi tańda zań konsýltanttary men advokattarǵa jeke kabınet ashylyp, biryńǵaı saıt jasalynǵan.
Osyǵan oraı, «E-Zań kómegi» AJ zań konsýltanttary men advokattardyń qyzmetin avtomattandyrýǵa jáne ońtaılandyrýǵa, halyqqa zań kómegin kórsetý kezinde memlekettik organdardyń aqparattyq júıelerinen aqparatty jedel alýǵa, ony onlaın rejiminde kórsetýge, qaǵaz qujat aınalymyn azaıtýǵa, memlekettik organdardyń aqparattyq júıelerinen málimet alý kezinde ýaqytty únemdeýge jáne qarjylaı shyǵyndardy azaıtýǵa múmkindik beredi.
Esterińizge sala ketsek, budan buryn Ádilet mınıstrligi, «Zań keńesshileri palatasy» RQB jáne UAT AQ arasynda jasalǵan Memorandým aıasynda Astana, Almaty, Qostanaı, Qaraǵandy, Aqtaý, Shymkent, Qyzylorda, Pavlodar, Kókshetaý jáne basqa da qalalarynyń zańgerleri men advokattaryna júıeni qalaı qoldaný kerektigi týraly túsindirý jumystaryn júrgizgen edi.
