Qazaqstanda zamanaýı jel elektr stansalary salynýy múmkin
ASTANA. QazAqparat - Qazaqstan men Shvetsııa zanaýı jel elektr qondyrǵylaryn ornatý máselesin talqylap jatyr. Elimizdiń klımatyn paıdalana otyryp, balamaly energııany kórshi elderge de tasymaldaýǵa bolady, dep xabarlaıdy QazAqparat tilshisi.
Qazaqstannyń Shvetsııadaǵy Tótenshe jáne Ókiletti elshisi Dastan Eleýkenovtiń aıtýynsha, ol qondyrǵylar qazirgi jel elektr stantsııalaryna uqsamaıdy. Atalǵan texnologııada jańa kompozıttik materıaldar qoldanylady. Sondaı-aq kompıýterlik basqarý júıesi de jetik.
"Ondaı qondyrǵylardy ornatý ońaı. Áıtpese, qazir alyp týrbınalardy qoıý úshin tikushaqtyń kómegine júginý kerek. Al shvedter usynyp otyrǵan qondyrǵylar jeńil ári energııany óndirý kólemi artyq. Olardyń strategııalyq josparlaý mamandary Qazaqstandy jan-jaqty zerdelep, jańa jel elektr qondyrǵylaryn osynda ornatqan durys degen sheshimge keldi. Sebebi bizde ınvestıtsııalyq jaǵdaı da, klımat ta yńǵaıly. Ol energııany eksporttaýǵa da bolady eken", - dedi D. Eleýkenov búgin Astanadaǵy baspasóz máslıxatynda.
Elshiniń sózine qaraǵanda, búginde naqty sheshim joq. Sebebi qarjynyń kózi áli anyqtalmaǵan. "Sońǵy eki jyl boıy biz osy máselemen aınalysyp kelemiz. Jańa jel elektr stansalary osynda salynady dep oılaımyz. Biz soǵan kúsh salamyz", - dep atap kórsetti elshi.
Aıta keteıik, baspasóz máslıxaty barysynda elshi D. Eleýkenov shvedterdiń Qazaqstandy qanshalyqty biletini jaıynda aıtyp berdi. Onyń aıtýynsha, shved xalqy "stan" jurnaǵy bar elderdi áli kúnge deıin aıyra almaıdy .
