Qazaqstanda zamanaýı saýda formatyna qatysty ózgeris bolady - Arman Shaqqalıev
Kooperatıvtik dúkenderdi jáne «úı janyndaǵy dúkender» kooperatsııasyn qurýdy pysyqtap jatyrmyz. Bul týraly Parlament Májilisinde saýda saıasatyn damytýǵa arnalǵan Úkimet saǵatynda Saýda jáne ıntegratsııa mınıstri Arman Shaqqalıev aıtty, dep habarlaıdy Kazinform.
«Bıznes pen halyq úshin qolaıly jaǵdaı jasaý maqsatynda qazirgi zamanǵy saýda formattarynyń úlesin arttyrý boıynsha jumys jalǵasyp jatyr. Qazir Qazaqstanda zamanaýı saýda formattarynyń úlesi 31 paıyzdy qurady. Kórshi Reseıde bul kórsetkish 70 paıyz. Damyǵan elderde bul kórsetkish 90 paıyz shamasynda», - dedi A. Shaqqalıev.
Bul rette ol Qazaqstanda saýda alańdarymen qamtamasyz etý halyqaralyq deńgeıden tómen ekenin aıtty.
«Bizdiń mindetimiz – memlekettik qoldaý tetikteri arqyly 2027 jylǵa qaraı saýdanyń qazirgi zamanǵy formattarynyń úlesin 56 paıyzǵa deıin arttyrý. Osy jyly Bıznestiń jol kartasynda qurylys salýǵa, qaıta qurýǵa nemese jabdyqty satyp alýǵa kredıt alatyn saýda obektileri úshin syıaqy mólsherlemesin tómendetý qarastyrylǵan», - dedi mınıstr.
Onyń aıtýynsha, saýda bazarlaryn jańǵyrtý baǵyttary boıynsha sharalar qabyldanady. Qazirgi kezde barlyq saýda obektisine qatysty zertteý jasalyp jatyr. Zerttelgen aqparat saýda obektileriniń ınteraktıvti tsıfrlyq kartasynda kórsetiledi. Saýda-sattyqqa qolaıly jaǵdaı jasaý úshin ákimdiktermen birlesip saýda alańdarymen qamtamasyz etýdiń oblystyq normatıvteri (sanepıd sharttary, órt qaýipsizdigi jáne t.b.) qabyldanbaq. Óndirýshige tıisti jaǵdaı jasaý baǵytynda jármeńkeler, kóshe saýdasy, kórmeler, «úı janyndaǵy» dúkender sııaqty kóp formatty saýda-sattyqty damytýǵa erekshe nazar aýdarylady.
«Biz kooperatıvtik dúkenderdi jáne «úı janyndaǵy dúkender» kooperatsııasyn qurýdy pysyqtap jatyrmyz. Bul shaǵyn dúkenderge birlesken kóterme satyp alýdy uıymdastyrýǵa múmkindik beredi. Bolashaqta biz olardy aýyl sharýashylyǵynyń ónimdi saqtaý, irikteý sııaqty ortalyqtarymen baılanystyramyz. Bul ónimderimizdiń ishki naryǵyn kóbeıtýge jaqsy áser etedi», - dedi vedomstvo basshysy.
