Qazaqstanda zamanaýı kóshpendilerge arnalǵan jańa Neo Nomad vızasy engizildi
ASTANA. KAZINFORM - Memleket basshysy Qasym-Jomart Toqaevtyń tapsyrmasy boıynsha Neo Nomad dep atalatyn jańa vıza túri engizildi. Bul vıza zamanaýı kóshpendilerge – saıahattap, qashyqtan jumys isteıtin sheteldik týrısterge arnalǵan.
Jańa vızalyq rejım pandemııadan keıin osyndaı baǵdarlamalardy sátti engizgen 50-den astam eldiń halyqaralyq tájirıbesin nazarǵa alǵan.
Neo Nomad vızasyn alý úshin sheteldik azamat Qazaqstannan tys jerde turaqty kirisiniń bar ekenin dáleldeýi kerek, onyń mólsheri aıyna keminde 3 000 AQSh dollaryn quraýy qajet. Sonymen qatar negizgi kiris talaptarynan basqa, sheteldik ótinish berýshige medıtsınalyq saqtandyrý jáne sottylyǵynyń joqtyǵy týraly anyqtama talap etiledi.
Vıza qashyqtan jumys isteıtin týrısterge, ıaǵnı baǵdarlamalaý, marketıng, qarjy, konsaltıng, dızaın jáne elektrondy kommertsııa sııaqty túrli salalarda qyzmet etetin sheteldik azamattarǵa arnalǵan. Vıza ıeleriniń bir jylǵa deıin Qazaqstanda turýǵa múmkindigi bar. Osy ýaqyt ishinde olar sheteldik kompanııalarda jumys isteı alady. Bul sheteldik týrısterge Qazaqstan mádenıeti men turmysyn jaqynyraq tanýǵa múmkindik berse, elge ekonomıkalyq paıda ákeledi dep kútilýde.
Vıza engizilgen jaǵdaıda jylyna ony 500 adam alsa, ekonomıkalyq áser shamamen 3,6 mlrd teńgeni quraıdy dep boljanyp otyr. Neo Nomad vızasyn paıdalanatyn sheteldik azamattar Qazaqstanda turyp, qarajatyn osynda jumsaıdy, biraq otandyq eńbek naryǵyna áser etpeıdi. Bul baǵdarlamanyń mańyzdy aspektisi.
«Týrızm jáne sport, Syrtqy ister, Іshki ister mınıstrlikteri jáne basqa da múddeli memlekettik organdardyń birlesken jumysynyń nátıjesinde Qazaqstan zamanaýı kóshpendilerdiń saıahat kartasyna endi. Olardyń álemdegi sany 35 mıllıonnan asady, biz olardy elimizge tartý úshin barlyq jaǵdaıdy jasaýdy kózdep otyrmyz. Ásirese Almaty men Astana qalalary neo-kóshpendiler úshin tartymdy 150 qalanyń qataryna kiredi», – dedi Týrızm jáne sport mınıstri Erbol Myrzabosynov.
Osyǵan deıin Event tourism Astanadaǵy týrızm trendteriniń birine aınalatynyn jazǵan edik.
