Qazaqstanda Yandex Go servısteriniń jumysy toqtady
ASTANA. KAZINFORM – Qazaqstanda ıAndeks Go servısteriniń jumysy buzylyp, paıdalanýshylar taksı shaqyrý jáne jetkizý qyzmetterin qoldanýda qıyndyqtarǵa tap boldy.
Kompanııanyń baspasóz qyzmeti keıbir servısterde aqaý bar ekenin rastady. Qazir mamandar olardyń jumysyn qalpyna keltirýge kúsh salyp jatyr. Alaıda qyzmetterdiń qashan tolyq iske qosylatyny ázirge belgisiz.
ıAndeks ókilderiniń túsindirýinshe, kúrdeli tsıfrlyq servısterdiń jumysy ártúrli elderde ornalasqan serverlerge táýeldi. Sondyqtan bir serverdegi aqaý basqa elderdegi qyzmetterdiń jumysyna da áser etýi múmkin.
– Ókinishke qaraı, qazir keıbir servıster durys jumys istemeýi múmkin. Qyzmetterdiń jumysyn múmkindiginshe tez qalpyna keltirý úshin mamandarymyz jumys istep jatyr, – delingen kompanııanyń baspasóz qyzmeti taratqan túsiniktemede.
Kompanııanyń málimetinshe, júıeniń bir bóliginde aqaý paıda bolǵan jaǵdaıda, júkteme basqa serverlerge aýystyrylady. Bul servısterdiń jumysyn qalpyna keltirýge jáne qaıtalama aqaýlardyń aldyn alýǵa kómektesedi.
Sondaı-aq ıAndeks Qazaqstan zańnamasyna sáıkes jumys isteıtinin jáne qazaqstandyq paıdalanýshylardyń jeke derekteri el aýmaǵyndaǵy serverlerde saqtalatynyn habarlady.
Budan bólek, Yandex Cloud elektr qýatynyń úzilýine baılanysty keıbir servısterdiń jumysynda aqaý bolǵanyn málimdedi. Kompanııanyń habarlaýynsha, ru-central1-a aımaǵynda elektrmen jabdyqtaý úzilgen. Qazir mamandar máseleni sheship jatyr.
ıAndeks Go mereke kúnderi jol júrýdi qalaı arzandatýǵa bolatynyn aıtyp bergen edi.
