Qazaqstanda vorkaýttan halyqaralyq jarystar ótetin bolady - Ý.Ten
ALMATY. QazAqparat - Budan bylaı Qazaqstanda da vorkaýttan halyqaralyq jarystar ótetin bolady. Bul týraly búgin Almatyda tuńǵysh ret strıt vorkaýtqa arnalǵan sport alańynyń ashylý saltanatynda osy sharany uıymdastyrǵan «World Class Almaty» sport kesheniniń atqarýshy dırektory Ýálıhan Ten málim etti.
Onyń aıtýynsha, búgin «Mega» saýda oıyn-saýyq kesheniniń aýmaǵyna qurylǵan «Strıt vorkaýt» sport alańynda halyqaralyq jarystarǵa qatysatyn alǵashqy qarlyǵashtar daıyndalatyn bolady.
«Óıtkeni bul sport alańy álemdik standarttarǵa saı jasaldy. Munda 17 snarıad ornatylǵan. Endi olarda san túrli jattyǵýlar jasaýǵa bolady. Strıt vorkaýt - bul aýlalyq jattyǵý, aýlalyq fıtnes. Densaýlyqty jaqsartýǵa, symbatty bolýǵa arnalǵan. Búgingi shara - Elbasynyń halyqqa Joldaýynda salaýatty ómir saltyn nasıhattaýǵa qatysty aıtqan úndeýi aıasynda qolǵa alynyp otyrǵan áleýmettik joba. Atalmysh sport alańyn ashýǵa «Bank RBK» banki demeýshilik kórsetti», - dedi óz sózinde Ýálıhan Ten.
Sonymen qatar, Ýálıhan Ten bıyl Almatyda osyndaı taǵy úsh aýlalyq strıt vorkaýt sport alańdarynyń ashylatynyn jetkizdi. Olardyń ekeýi kóppáterli turǵyn úılerdiń aýlalaryna, al biri iri saýda oıyn-saýyq kesheniniń aýmaǵyna ornatylatyn bolady.
Búgingi sharaǵa Almaty qalalyq Jastar saıasaty basqarmasynyń bastyǵy Sanjar Boqaev pen «Bank RBK» AQ dırektorlar keńesiniń múshesi Ánýar Saıdenov qatysty.
«Jastarymyzdyń dene shynyqtyrý jattyǵýlarynyń osy túrine qyzyǵýshylyq tanytyp jatqany kóńil qýantady. Jalpy vorkaýt, parkýr sekildi sport túrleri halyq arasynan shyǵyp kópshilikke tanymal boldy. Bizde de endi solarmen kásibı turǵyda aınalysatyn jastar kóbeıedi degen oıdamyn» - dedi sóz sózinde Á.Saıdenov.
Saltanatty sharadan keıin Almatyda qurylǵan alǵashqy «Vorkaýt» komandasynyń sportshylary ár túrli snarıadtarda óner kórsetip, kópshilikti tánti etti. Budan bylaı da atalmysh sport alańyna kez-kelgen adam kelip tegin jattyǵa alady.
Esterińizge sala keteıik, Vorkaýt (Workout) - jappaı dene shynyqtyrýǵa arnalǵan jattyǵýlardyń bir túri. Aýlalarda nemese arnaıy alańdarda týrnık, qyrly bóreneler, shved qabyrǵasy, kóldeneń baspaldaqtar jáne basqa da qurylymdar ornatylyp, olarda san túrli jattyǵýlar jasaýǵa bolady. Vorkaýttan alǵashqy halyqaralyq chempıonat 2011 jyly Latvııada ótken bolatyn. Onda birinshi oryn alǵan ýkraındyq sportshy Evgenıı Kocherga 16 kılogrammdyq kir tasyn tisimen tistep, týrnıkke bir qolymen tartylǵan.
