Qazaqstanda volonterlerdiń ulttyq júıesin qalyptasyrý josparlanyp otyr - BUU eriktiler baǵdarlamasy
ASTANA. Jeltoqsannyń 5-si. QazAqparat /Arman Asqarov/ - Búgin Lev Gýmılev atyndaǵy Eýrazııa ulttyq ýnıversıtetinde Eriktilerdiń halyqaralyq kúni aıasynda «Volonterler jármeńkesi» uıymdastyryldy,
dep habarlaıdy QazAqparat.
Іs-sharanyń basty maqsaty - el aımaqtaryndaǵy volonterler uıymdary arasyndaǵy áriptestik baılanystardy ornatyp, BUU-nyń eriktiler baǵdarlamasyna jańa úmitkerlerdi irikteý. Búgingi jármeńke aıasynda osy saladaǵy BUU-nyń jobalary tanystyrylyp, Qazaqstandaǵy volonterlik uıymdardyń ulttyq júıesin qalyptastyrý máselesine arnalǵan semınardy ótkizý josparlanyp otyr. «Shyny kerek, qazirgi kezde Qazaqstandaǵy volonterlerdiń naqty sany belgisiz. Olardyń qyzmet etý aıasy men shoǵyrlanǵan salasy týraly naqty aqparat joq. Oǵan qosa, volonterlik uıymdardyń basym bóligi óz áriptesteri týraly bilmeı jatady. Sondyqtan biz volonterlerdiń ulttyq júıesin qalyptastyrý arqyly Qazaqstandaǵy eriktilerdiń qyzmetin rettep otyrýdy kózdep otyrmyz», - deıdi BUU eriktiler baǵdarlamasynyń úılestirýshisi Agnı Baljınnıam.
Aıta keteıik, eriktilerdiń bıylǵy Halyqaralyq kúni merekesi «Volonterler bizdiń jahanymyz úshin!» uranymen ótip, onyń aıasynda ekologııalyq máselelerge erekshe basymdyq berilýde. Basty maqsat - aǵymdaǵy jyly jeltoqsan aıynda ótetin Kopengagendegi keńeste jahandyq ekologııalyq kelisimniń júzege asyrylýyn qamtamasyz etý.
