Qazaqstanda volonterler jalaqy ala ma

NUR-SULTAN. QazAqparat – Jalaqyny volonterlikpen turaqty túrde aınalysatyndar ǵana ala alady. Bul týraly Ortalyq kommýnıkatsııalar qyzmetinde ótken onlaın-brıfıngte aıtyldy, dep habarlaıdy QazAqparat tilshisi.

«Bizdiń qozǵalystyń aýqymy – keń, múshesi de – kóp. Biz memlekettik áleýmettik tapsyrystarǵa qatysamyz, ol - memlekettiń volonterlerdi qoldaýy, al jaýapkershilikti biz óz moınymyzǵa alamyz. Qatardaǵy volonterler bul týraly biledi, sebebi bul da - olar úshin úlken motıvatsııa. Uıym ishinde olar basqarýǵa qatysty úlken tájirıbe jınap, jobalar jasaıdy. Odan keıin baryp jalaqy alatyndardyń qataryna ene alady. Negizinde memlekettik tapsyrys – qomaqty qarajat emes. 2013 jyldan beri biz qozǵalys retinde jumys istep kelemiz. 2016 jyly ǵana memlekettik tapsyrysqa qatysyp, «Volonterlik korpýs» jobasyna 6 mıllıon teńge bólindi. Osy joba aıasynda 150 usaq shara júzege asyryldy. Osy 6 mıllıon teńgeniń 30%-y jalaqyǵa ketedi. Ony 12 aıǵa bólseń, kóp aqsha emes. 2017 jyly bıýdjetten 20 mıllıon teńge bólindi. 150 adam trenıng, sonyń ishinde bilim berý sıpatynda trenıng ótkizdi. Biz óz qarajatymyzdy salatyn jobalar da bar», - deıdi Qazaqstan volonterleri lıgasynyń tóraıymy Aısulý Ernııazova.

Onyń aıtýynsha, jalaqyny turaqty túrde volonterlikpen aınalysatyndar ala alady.

«Shamamen 5 adam azdaǵan jalaqy ala alady. Ol memlekettik tapsyrystan túsetin qarjynyń 30%-y. Jalaqyny tek volonterlikpen aınalysatyn adamdar ǵana alady, óıtkeni volonterler – tek qana volonterlikpen aınalysatyn kásibı mamandar», - deıdi ol.