Qazaqstanda vırýsty gepatıtpen kúresý boıynsha aılyq bastaldy
Vedomstvoda habarlaǵandaı, medıtsınalyq-sanıtarlyq kómektiń alǵashqy uıymdarynda ashyq esik kúnderi uıymdastyrylady. Onda azamattar ınfektsıonıst, gastroenterolog, gepatolog mamandardyń vırýsty gepatıttyń aldyn alý, dıagnostıkalaý jáne emdeý máseleleri boıynsha tegin konsýltatsııalar alyp, skrınıngtik tekserýlerden óte alady.
«Sharany ótkizýdiń maqsaty - qoǵamnyń nazaryn aýrýdyń aldyn alý, skrınıngke, vırýstyq gepatıtpen jáne onymen baılanysty aýrýlarmen kúresýdi kúsheıtý máselelerine aýdarý», delingen habarlamada.
Eske salsaq, vırýsty gepatıt - baýyrdyń qabynbaly ınfektsııalyq aýrýy. A, B, C, D jáne E vırýstarynyń saldarynan álemniń júzdegen mıllıon adamdary jiti jáne sozylmaly baýyr aýrýynan zardap shegýde, ásirese V jáne S gepatıtinen jylyna 1,4 mıllıon adam ólim-jitimge ushyraıdy.
Ádette A jáne E gepatıtine shaldyǵýdyń sebebi taza emes taǵam men sýdy tutynýdyń saldarynan bolady. V, S jáne D gepatıti aǵzanyń juqpaly suıyqtyǵymen baılanys nátıjesinde juǵady. Osy vırýstardyń berilýiniń keń taraǵan tásilderiniń qataryna vırýs juqqan qan nemese qannyń ónimin quıý, las qural-jabdyqtardy qoldaný arqyly ınvazıvtik medıtsınalyq sharalary kiredi. V gepatıti sondaı-aq bosaný kezinde anadan balaǵa, otbasy múshesinen balaǵa, jynystyq qatynas kezinde juǵady.
Bul aýrýdyń keń taralýy, sonymen qatar naýqasty dıagnostıkalaý men emdeýdiń qıyndyqtary eskerilip, búgingi tańda profılaktıkalyq sharalar júrgizý jáne adamnyń óziniń densaýlyǵyna degen ortaq jaýapkershiligi úlken ról atqarady. Jeke basty qorǵaý sharalaryn saqtaý mańyzdy. Olar: qaýipsiz taǵam men sýdy paıdalaný; ınektsııa alý úshin bir rettik ıneler men shpırıtsterdi paıdalaný; qaýipsiz jynystyq qatynasty nasıhattaý; kosmetıkalyq sharalardy (tatýırovka, pırsıng jáne t.b.) lıtsenzııasy bar arnaıy mekemelerde jasatý; balalardy Ulttyq egý kúntizbesi boıynsha V gepatıtine qarsy egý.