Qazaqstanda VICh indetin juqtyrǵan 30 myńǵa jýyq adam tirkeýde tur
ASTANA. QazAqparat - 1 jeltoqsan - Dúnıejúzilik SPID-ke qarsy kúres kúni. Resmı statıstıkaǵa súıensek, Qazaqstanda VICh indetin juqtyrǵan 30 myńǵa jýyq adam tirkeýde tur. Almaty qalasynda osy dıagnozben ómir súrip jatqandar sany 5 myńǵa jýyqtaıdy. Bul týraly QazAqparat Medıtsınalyq saqtandyrý qorynyń baspasóz qyzmetine silteme jasap habarlaıdy.
«Jurtshylyq arasynda VICh seks-ındýstrııa qyzmetkerleri, gomoseksýalıster nemese nashaqorlardyń aýrýy degen jańsaq pikir qalyptasqan. Sebebi, vırýs adam aǵzasyna qan men sháýet arqyly, ana súti arqyly da taralýy múmkin. Ol bir shprıtsti paıdalanǵanda, jynystyq qatynas kezinde nemese bosanǵan kezde anadan balaǵa juǵady. Ony medıtsına quraldary durys zararsyzdandyrylmaǵan jaǵdaıda aýrýhanalarda juqtyrý qaýpi de joq emes. Biraq VICh juqtyrǵan naýqaspen bir staqannan sý ishkennen, bir súlgi paıdalanǵannan nemese súıisken kezde aýrý juqpaıdy. Sondaı-aq, ınfektsııa silekeı arqyly nemese aýa arqyly taralmaıdy» delingen baspasóz baıanynda.
Respýblıkalyq SPID-ke qarsy kúres ortalyǵynyń málimetinshe, ótken jyly elimiz boıynsha 2 865 adam vırýs juqtyrǵan. Onyń 1 700-den astamy - er adamdar, myńnan astamy - áıelder. 62 paıyzy geteroseksýaldyq qatynas saldarynan bolǵan. Syrqatqa shaldyqqandardyń basym bóligi - 30 ben 49 jas aralyǵyndaǵylar.
«Bul aýrý ár kezeńde ártúrli sımptomdarǵa ıe. Vırýs juqtyrǵannan keıin alǵashqy 2-4 aptada naýqastardyń 40-90 paıyzy ózderin sýyq tıgendeı sezinedi. Denesi del-sal bolyp, tamaǵy aýyrady, tońyp, ústi qyshıdy, aýyz qýysynda jara paıda bolyp, lımfa bezderi ulǵaıady. Testerdiń bári bolmasa da, kópshiligi vırýs arqyly bólinetin antıdenelerdi anyqtaı alady. Degenmen, ár jarty jylda nemese jylyna bir ret VICh-ke test tapsyrýdy ádetke aınaldyrǵan jón. Onyń ústine, qazaqstandyqtar tekserýdiń bul túrinen turǵylyqty emhanasy arqyly tegin óte alady», - deıdi Medıtsınalyq saqtandyrý qorynyń Almaty fılıaly dırektory Tileýhan Ábildaev.
Mamandardyń aıtýynsha, ımmýn tapshylyǵy vırýsyn emdeýge bolady. Biraq odan tolyq aıyǵyp ketý múmkin emes. Retrovırýsqa qarsy kúsheıtilgen terapııanyń arqasynda vırýs juqtyrǵan patsıentterdiń ómirin 70-80 jasqa deıin uzartýǵa bolady, deıdi maman.
«Vırýs anyqtalǵan jaǵdaıda naýqas eń aldymen SPID ortalyǵyna baryp tirkelýi tıis. Óıtkeni, aýrýdy baqylaýda ustaýdyń mańyzy óte zor. Esepte turǵan azamattar kepildendirilgen tegin medıtsınalyq kómek sheńberinde retrovırýsqa qarsy emdi tegin ala alady. Der kezinde emdelmese ımmýn tapshylyǵy vırýsy SPID-ke aınalyp ketedi», - deıdi T. Ábildaev.
Aıtýynsha, esepte turǵan azamattar retrovırýsqa qarsy emdi tegin ala alady. VICh juqtyrǵan analardyń balalaryna arnalǵan taǵamdar men dári-dármek tegin beriledi.
