Qazaqstanda veterınarlardyń tapshylyǵy sheshilmegen kúıinde qalyp otyr - halyqaralyq konferentsııa
Bul týraly búgin elordada «Qazaqstan Respýbılkasyndaǵy veterınarııanyń jaǵdaıy jáne damý perspektıvasy» taqyrybynda ótken halyqaralyq konferentsııada S.Seıfýllın atyndaǵy Qazaq agrotehnıkalyq ýnıversıteti veterınarııa jáne mal sharýashylyǵy tehnologııasy fakýltetiniń dekany Balǵabaı Maıqanov aıtty.
«Aýyldyq jerlerge veterınarlyq mamandardy tartý jáne memleket tarapynan beriletin kómek arqyly olardyń turaqtanýyn qamtamasyz etý máseleleri áli sheshilmeı otyr. Osy baǵytta qolǵa alý josparlanǵan jumystar tek memlekettik qyzmette júrgen veterınar mamandardy ǵana qamtıdy. Al veterınarlyq is-sharalardy júrgizetin naqty mamandar bul sanattan tys qalýda. Bir sózben aıtqanda, veterınarııa mamandarynyń kadrlyq tapshylyǵy sheshilmegen kúıinde qalyp otyr», - dep atap ótti ol.
«Qazirgi tańda aýyldy aýmaqtardyń úshten bir bóliginde veterınar mamandar joq. Mundaı jaǵdaımen eldegi epızootıkalyq jetistikter men mal sharýashylyǵynyń damýy týraly aıtý orynsyz», - dep jalǵastyrdy ǵalym.
B.Maıqanovtyń atap ótýinshe, aýyldyq jerlerde birde-bir veterınar maman bolmaǵannan keıin qosymsha memlekettik baqylaý qurylymdaryn qurýǵa baǵyttalǵan jumystar tıimsiz bolyp tabylady.
