Qazaqstanda veterınarlardyń ortasha jasy - 58

NUR-SULTAN. QazAqparat - «Aýyl» halyqtyq-demokratııalyq patrıottyq partııasynyń tóraǵasy Álı Bektaev veterınar mamandardyń jetispeýshiligin synǵa aldy, dep habarlaıdy QazAqparat tilshisi.

«Elimizde veterınarlyq qyzmetterdiń jumysy qatty synǵa ushyrap jatyr. Epızootııalyq máselelerdi alǵa tartqan mundaı qyzmetter zańǵa qaıshylyq týyndatyp, veterınarlyq-aldyn alý sharalaryn tolyqqandy júrgizbeıdi. Mal basy tolyq qamtylmaıdy. Jaǵdaıdy jaqsy qylyp kórsetý maqsatynda kóptegen qaýipti aýrýlardyń taralýyn jasyrý faktileri oryn alýda», - dedi Álı Bektaev partııanyń XVI esep berý-saılaý sezinde.

Sonymen birge, partııa ókili aýyldarda mal sanaǵy durys júrgizilmeıtinin jáne mamandar jetispeıtinin atap ótti.

«Bir ǵana mysal, búginde elimizde veterınar mamannyń ortasha jasy – 58. »Dıplommen aýylǵa« baǵdarlamasyn júzege asyrýda jergilikti atqarýshy organdardyń jumysyn qatań baqylaýǵa alý qajet. Atalǵan baǵdarlama elimizde 10 jyldan beri júrgizilip keledi. Negizgi maqsat – aýyldy gúldendirip, kadr jetispeýshiligin joıý.

Ulttyq ekonomıka mınıstrliginiń málimetine súıensek, 10 jylda 60 myńnan astam jas maman aýyldyq jerlerde densaýlyq saqtaý, bilim, áleýmettik qamtý, mádenıet, sport jáne agroóndiristik keshen salasynda jumyspen qamtylǵan», - dedi ol.

Vedomstvo statıstıkasyna sáıkes, olardyń kóbi Túrkistan oblysyna (6 703), Almaty (6253), jáne Batys Qazaqstan oblysyna (5 184) tartylǵan. Alaıda, qazir Qostanaı, Pavlodar jáne Soltústik-Qazaqstan oblystary kadr tapshylyǵyn tartyp otyr.

«Sońǵy jyldary dıplommen aýylǵa jol tartqan jastardyń qatary asa kóp emes. Jeńildetilgen baǵdarlama boıynsha olardyń qanshasy baspanaly bolǵandyǵy týraly resmı aqparat joq. Biz QR Aýyl sharýashylyǵy mınıstrligine aýyl sharýashylyǵy, veterınarııa jáne agroóndiristik keshen úshin tehnıkalyq mamandardy daıyndaý sapasyna baqylaý júrgizýdi usynýymyz qajet. Bul rette kásiptik tájirıbe, eńbekpen qamtý jáne túlekterdi aýyldyq jerlerge ornyqtyrý jumystary da shet qalmaýy kerek», - dedi Álı Bektaev.

Aıta keteıik, elordada «Aýyl» halyqtyq-demokratııalyq patrıottyq partııasynyń XVI esep berý-saılaý sezi bastaldy.

Sezd jumysy aıasynda partııanyń tóraǵasy saılanyp, saıası keńestiń jańa quramy bekitiledi jáne partııa jarǵysyna ózgertýler men tolyqtyrýlar engiziledi.