Qazaqstanda veterınarııalyq antıbıotıkterdi baqylaý kúsheıtiledi
ASTANA. KAZINFORM – Qazaqstanda veterınarııalyq preparattardy qoldanýdy retteý baǵytynda zańnamalyq ózgerister daıyndalyp jatyr. Bul týraly Óńirlik ekologııalyq sammıtte janýarlar densaýlyǵy boıynsha halyqaralyq keńesshi Dýrııa Charyphan málimdedi.
Onyń aıtýynsha, Shyǵys Eýropa men Ortalyq Azııa elderinde veterınarııalyq dárilerdiń basym bóligi áli de retseptsiz satylady. Bul mıkrobtarǵa tózimdilik máselesin ýshyqtyrýy múmkin.
– Qazaqstanda bul máseleni baqylaý úshin arnaıy baǵdarlama iske qosyldy. Qazir Májiliste antıbıotıkterdi ósý stımýlıatory retinde paıdalanýǵa tyıym salý jáne olardy tek retsept arqyly berý máselesi qaralyp jatyr, – dedi ol.
Onyń aıtýynsha, uqsas sharalar Ortalyq Azııanyń basqa elderinde de qolǵa alynǵan. Máselen, Qyrǵyzstan da veterınarııalyq preparattardy retsept arqyly berýge kóshýdi josparlap otyr.
Sonymen qatar halyqaralyq uıymdar jergilikti deńgeıde de jumys júrgizip jatyr. Atap aıtqanda, mamandar indet oshaqtaryn zerttep, veterınarlarǵa tájirıbelik kómek kórsetedi.
– Qazaqstanda 5 myńnan astam veterınarııalyq pýnkt bar. Alaıda keı jaǵdaıda mamandar vırýstyq jáne bakterııalyq aýrýlardyń aıyrmashylyǵyn ajyrata almaı jatady, – dedi Dýrııa Charyphan.
Onyń aıtýynsha, osy olqylyqtardy joıý úshin oqytý baǵdarlamalary iske asyrylyp jatyr. Sondaı-aq zerthanalardyń áleýetin arttyrý, halyqaralyq talaptarǵa saı tekserýler júrgizý jáne qajetti qural-jabdyqpen qamtamasyz etý baǵytynda jumystar jalǵasyp jatyr.
Buǵan deıin Qazaqstannyń 2030 jylǵa qaraı parnıktik gaz shyǵaryndylaryn 15%-ǵa qysqartýdy josparlap otyrǵany týraly jazǵanbyz.
