Qazaqstanda veterınarııa salasyndaǵy ókilettikter qaıta bólinedi
ASTANA. KAZINFORM — Májilis depýtattary veterınarııalyq qyzmettiń tıimdiligin arttyrý maqsatynda Kásipkerlik kodeks pen taǵy bes zańǵa ózgerister engizýdi kózdep otyr. Bul týraly Májilis depýtaty Nurjan Áshimbetov málim etti.
Depýtattyń aıtýynsha, endi epızootııalyq oshaqtardy tekserý men lıtsenzııalaý fýnktsııalary qaıtadan ortalyqqa qaıtarylmaq.
— Jergilikti atqarýshy organdardan epızootııalyq oshaqtarǵa tekserý júrgizý, epızootologııalyq tekserý aktilerin berý jáne veterınarııalyq-sanıtarııalyq saraptamany lıtsenzııalaý sııaqty fýnktsııalardy Veterınarııalyq baqylaý jáne qadaǵalaý komıtetiniń quzyretine berýdi kózdep otyrmyz, — dedi Nurjan Áshimbetov.
Sonymen qatar jergilikti ákimdikterge mal qorymdary men mal soıý pýnktterin salý, qaıta jańartý jáne olardy kútip ustaý ókilettigi beriledi. Al aýrý janýarlardyń qunyn óteý jáne preparattar satyp alý fýnktsııalary respýblıkalyq memlekettik mekemeniń qaraýyna ótedi.
Aıta keteıik, buǵan deıin, veterınarlarǵa ǵylymı dárejesi úshin qosymsha aqy tólenetinin habarlaǵan edik.
