Qazaqstanda veterınar dárigerler ózine tán emes fýnktsııalardan bosatylady

NUR-SULTAN. QazAqparat – Veterınarııa júıesindegi barlyq baqylaý-qadaǵalaý fýnktsııalary bir vedomstvoda shoǵyrlanady. Bul týraly Aýyl sharýashylyǵy mınıstri Erbol Qarashókeev málim etti, dep habarlaıdy QazAqparat tilshisi.

«Birinshi másele – ol veterınarııa júıesin reformalaý. Búgingi tańda biz osy júıeniń qazirgi ahýalyn muqııat taldadyq, problemalyq máseleler men olardyń paıda bolý sebepterin anyqtadyq. Osynyń negizinde olardy sheshý tásildemeleri ázirlendi. Atap aıtqanda, endi veterınarııa júıesindegi barlyq baqylaý-qadaǵalaý fýnktsııalary bir vedomstvoda, atap aıtqanda, Aýyl sharýashylyǵy mınıstrliginiń Veterınarııalyq qadaǵalaý jáne baqylaý komıtetinde shoǵyrlandyrylatyn bolady. Jergilikti atqarýshy organdardyń veterınarııalyq qyzmetteri tek atqarýshylyq fýnktsııalardy oryndaıdy. Osyndaı usynysty tıisti reforma jobasynda engizip otyrmyz. Ekinshiden, kelesi jyldan bastap praktıkalyq veterınarııalyq dárigerlerdiń jalaqysy orta eseppen 68%-ǵa ósedi», - dedi E. Qarashókeev Ortalyq kommýnıkatsııalar qyzmetinde.

Onyń aıtýynsha, veterınarııalyq dárigerler ózine tán emes fýnktsııalardan (qańǵybas ıtter men mysyqtardy aýlaý) bosatylyp, ózderiniń fýnktsıonaldyq mindetterin oryndaý úshin veterınarııalyq zańnamany buzýshylardy jaýapkershilikke tartý sekildi qosymsha ókilettikter alady.