Qazaqstanda veterınar dárigerler qansha jalaqy alady

ASTANA. QazAqparat – Byltyr veterınar dárigerlerdiń jalaqysy 50% artty. Bul týraly Ortalyq kommýnıkatsııalar qyzmeti alańynda ótken baspasóz máslıhatynda belgili boldy, dep habarlaıdy QazAqparat tilshisi.

«Jergilikti atqarýshy organdardyń aqparaty boıynsha, veterınar dárigerlerdiń jalaqysy byltyr respýblıka boıynsha 2021 jylǵa qaraǵanda 50% artty. Bıyl joǵary bilimi bar veterınar dárigerlerdiń jalaqysy 145 myń teńgeden, 282 myń teńge aralyǵyn quraıdy. Osy oraıda aıta ketkim keledi, 145 myń jáne 151 myń teńge kólemindegi jalaqy tek Shymkent qalasy men Qyzylorda oblysynda ǵana. Elimizdiń 12 óńirinde jalaqy 200 myń teńgeden joǵary. Al 6 óńirde veterınarlar 170-200 myń teńge aralyǵynda eńbekaqy alady», – dedi Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń tóraǵasy Asqar Jaqypbaev Ortalyq kommýnıkatsııalar qyzmetinde ótken brıfıngide.

Odan ári komıtet basshysy bıologııalyq agenttermen jumys istegeni úshin veterınarlardyń jalaqysyna 35 nemese 50 paıyz ústemaqy tólenetinin aıtty.

«Jalaqyny kóterýde veterınar dárigerlerdiń biliktilik sanaty eskeriledi. Sonymen qatar zań aıasynda «Qazaqstannyń veterınarııa salasyna eńbek sińirgen maman» memlekettik nagradasy jáne «Veterınarııa salasyndaǵy úzdik maman» ataǵy bolady», - deıdi AShM ókili.

Aıta ketsek, Qazaqstanda veterınar dárigerlerdiń mártebesin zańmen bekitý josparlanýda.