Qazaqstanda vedomstvoǵa baǵynyshty uıymdardy ońtaılandyrý júredi
«Qazirgi kezde 2020-2022 jyldarǵa arnalǵan úsh jyldyq bıýdjetti qalyptastyrýǵa kirisip jatyrmyz. Sondyqtan bizdiń aldymyzda shyǵyndardy ońtaılandyrý men ár teńgeniń tıimdiligin arttyrý boıynsha maqsat tur. Osyǵan baılanysty «Atameken» UKP-nyń, múddeli memorgandardyń, qoǵamdastyq ókilderiniń qatysýymen arnaıy úsh jumys tobyn qurdyq. Birinshi baǵyt memlekettik baǵdarlamalar aıasynda qoldaý sharalaryn qarastyrýǵa negizdelgen», - dedi Úkimet basshysynyń birinshi orynbasary baspasóz máslıhatynda.
Á. Smaıylov elimizde 14 memlekettik baǵdarlama bar ekenin, olarǵa 2,3 trln teńge bólinetinin eske saldy.
«Biz árbir membaǵdarlama aıasynda memlekettik qoldaý sharalary qanshalyqty tıimdi ári nátıjeli ekenin kórýimiz kerek. Osy oraıda tıimdiligi tómenderi boıynsha shyǵystardy qysqartyp, olardy tıimdiligi joǵary baǵyttarǵa burý iske asyrylady», - dedi ol.
Sonymen qatar, kelesi baǵyt vedomstvolyq baǵynyshty uıymdardy qaıta qarastyrýǵa baılanysty. Elimizde 6200-den astam vedomstvolyq baǵynyshty uıymdar bar bolsa, onyń ishinde 320-ǵa jýyǵy respýblıkalyq deńgeıde. Olarǵa jyl saıyn 400 mlrd teńgeden astam bólinedi.
«Osy oraıda vedomstvoǵa baǵynyshty uıymdardyń qaı bóligin jeke sektorǵa berýge bolatyndyǵyn nemese biriktirý jolymen qaıta qurýdy, sondaı-aq tıimsiz shyǵystardy qysqartý úshin olardyń qaısysynyń jumysyn toqtatýdy pysyqtaýymyz kerek», - dep túsindirdi mınıstr.
Úshinshi baǵyt ınvestıtsııalyq jobalarǵa negizdelgen, olarǵa bıýdjette 1 trln teńgege deıin qarjy jumysalady. Osy oraıda jol, mektep, aýrýhana, áleýmettik nysandardyń qurylysy eskerilgen. Bul turǵyda tıptik jobalyq-smetalyq qujatnamany paıdalanýdy tyńǵylyqty pysyqtaý qajettigi bar.
«Ár joba saıyn jańadan jobalyq-smetalyq qujatnamany ázirlemeý eskerilýde, sebebi bul sharalar shyǵyndy bolyp sanalady. Qazirgi kezde barlyq ákimshilerdi tıptik jobalyq-smetalyq qujatnamany paıdalanýy turǵysynda mindetteý boıynsha zańnamany qarap jatyrmyz», - dedi Álıhan Smaıylov.