Qazaqstanda vaktsınalardy saqtaý temperatýrasy onlaın baqylanady
ASTANA. KAZINFORM – Qazaqstanda vaktsınalardyń «sýyq tizbegin» baqylaýdyń tsıfrlyq júıesi keńeıtilip, preparattardy saqtaý temperatýrasy arnaıy datchıkter arqyly avtomatty túrde baqylanady, dep habarlaıdy Densaýlyq saqtaý mınıstrliginiń baspasóz qyzmeti.
Jańa júıe vaktsınalardy saqtaý men jetkizýdiń barlyq kezeńin – qoımadan bastap medıtsınalyq uıymǵa deıingi aralyqty qamtıdy. Bul týraly Densaýlyq saqtaý mınıstrliginde ótken keńeste QR Bas memlekettik sanıtarııalyq dárigeri Sarhat Beısenova málimdedi.
Joba aıasynda elimiz boıynsha 3,5 myńnan astam nysandy qamtý kózdelip otyr.
Qazirgi ýaqytta vaktsınalardy saqtaý kezinde temperatýralyq rejım mindetti túrde baqylanady. Jańa júıe qoldanystaǵy baqylaýdy tolyqtyryp, tońazytqysh jabdyqtarynan alynǵan málimetterdi biryńǵaı tsıfrlyq platformaǵa avtomatty túrde jiberýge múmkindik beredi.
Temperatýra belgilengen parametrlerden aýytqysa, mamandar máseleniń qaı kezeńde týyndaǵanyn jedel anyqtap, tıisti sharalar qabyldaı alady. Al ımmýnobıologııalyq preparattardy tasymaldaıtyn mamandandyrylǵan kólikter GPS arqyly baqylanady.
– Sýyq tizbek – ımmýndaý júıesiniń negizgi elementteriniń biri. Avtomattandyrý vaktsınalardy saqtaý jáne tasymaldaý jaǵdaılaryn turaqty baqylaýdy qamtamasyz etip, kez kelgen aýytqýǵa jedel den qoıýǵa múmkindik beredi, – dedi Sarhat Beısenova.
Joba sheńberinde 21 myńnan astam monıtorıng núktesin qurý josparlanǵan. Sondaı-aq elimizdiń barlyq 20 óńirindegi 800-den astam mamandandyrylǵan kólik quraly baqylaýǵa alynady.
Budan bólek, vaktsınalardy saqtaýǵa arnalǵan jabdyqtar jańartylady. Pandemııa qorynyń qarajaty esebinen tońazytqysh kameralar, muzdatqyshtar jáne aýdandyq deńgeıdegi medıtsınalyq uıymdarǵa shamamen 900 tońazytqysh satyp alý josparlanyp otyr.
Jańa tsıfrlyq jobanyń negizgi maqsaty – vaktsınanyń búkil qozǵalys jolynda «sýyq tizbektiń» senimdi baqylaýyn qamtamasyz etý jáne saqtaý men tasymaldaý talaptarynyń buzylý qaýpin azaıtý.
Aıta keteıik, «Gardasıl 9» vaktsınasyn satyp alý jumystary júrip jatyr.
