Qazaqstanda vaktsınalaý qarqyny nege baıaýlady: Alekseı Tsoı túsindirdi

NUR-SULTAN. QazAqparat – Qyrkúıekte 10 mln adamdy ekpemen qamtý týraly jospar nege 7 mln adamǵa ǵana oryndaldy? QR Densaýlyq saqtaý mınıstri Alekseı Tsoıǵa Ortalyq kommýnıkatsııalar qyzmetinde osyndaı suraq qoıyldy, dep habarlaıdy QazAqparat tilshisi.

«Birinshi kezekte, Qazaqstan naryǵynda vaktsınalardyń qoljetimdilik máselesi bar. Ózderińiz bilesizder, kóptegen elder óz qajettilikterin málimdeı bastady. Biz kólemdi kezeń-kezeńimen ulǵaıtyp otyrdyq. Qazir biz sol esebizdiń jaǵdaıǵa sáıkes kelgenin kórip otyrmyz. Jazda bizde vaktsınalaý qarqyny belgili bir mólsherde tómendedi. Endi kúzde qaıta artatynyn kútip otyrmyz. Adamdar demalystan oraldy, endi koronavırýs bar ekenine kúmándanbaıdy, vaktsınanyń tıimdi ekenine kóz jetkizdi. Biz vaktsına almaǵan azamattardyń basym kópshiligi aýyryp jatqanyn kórip otyrmyz», - degen mınıstr qazirgi qarqyn kóńilge qonymdy ekenin atady.

«Qazir 7,7 mln azamattyń senim artyp, vaktsına alǵanyn kórip otyrmyz. Bizde eresek turǵyndardan vaktsına almaǵan 4 mıllıon adam qaldy. Jalpy, eresekterdiń basym bóligi ekpe aldy. Izraılge, Ulybrıtanııaǵa qarańyz. Alǵashqy aılarda vaktsınatsııa qaýyrt júrdi. Qazir ol jaqta da vaktsına alýshylardyń qarqyny báseń. ıAǵnı, aldymen suranys artyp, keıin bir qalypty ekpinmen jalǵasyp jatyr. Qazirgi qarqynymyzdy túsirmesek, vaktsınatsııanyń qarqyny jaqsy ekenin kórip otyrmyz», - dep túsindirdi Alekseı Tsoı.

Onyń aıtýynsha, vaktsınaǵa alǵashynda kúmánmen qaraý álem elderiniń bárinde bolǵan.

«Jalpy, koronavırýs ınfektsııasynyń ózi jańa ınfektsııa. Sondyqtan bári oǵan saqtyqpen qaraıdy. Qazir vaktsınatsııa jaqsy qarqynmen júrip jatqanyn kórip otyrmyz. Bul, ınnovatsııaǵa qalypty reaktsııa. Adam bizdiń elde ǵana emes, búkil álemde de osylaı áreket etedi. Bul - qalypty jaǵdaı», - dedi vedomsto basshysy.