Qazaqstanda vaktsınalardyń quramy týraly aqparat qamtylǵan úkimettik saıt qurý usynyldy

NUR-SULTAN. QazAqparat – Elordadaǵy Gorkıı atyndaǵy teatrdyń aktrısasy Svetlana Fortýna vaktsınalardyń quramy týraly aqparatty qamtıtyn úkimettik saıt qurý usynysyn jasady, dep habarlaıdy QazAqparat tilshisi.

«Ana retinde ekpeden keıingi asqyný jaǵdaılaryn zertteýge kóp ýaqyt jumsaımyz. Osy oraıda ekpelerdiń quramyna qatysty aldyn ala aqparattandyrý sharalary bolýy tıis. Sebebi, biz bul taqyrypty zertteý máselesimen kóp aınalysamyz», - dedi S. Fortýna Qazaqstandaǵy mindetti ekpe máselesin talqylaýǵa arnalǵan onlaın konferentsııada.

«Bul baǵyttaǵy usynystar aıasynda úkimettik saıt qurý kerektigin alǵa tartamyz. Onda vaktsınalarǵa qatysty barlyq túsiniktemeler, bolýy múmkin asqyný jaǵdaılary, ekpeniń tıimdiligine baılanysty zertteýler qamtylǵan jón», - dedi ol.

Onyń paıymynsha, bul sharalar ekpeler jaıynda tolyq aqparat alýǵa múmkindik beredi.

Konferentsııa barysynda Densaýlyq saqtaý vıtse-mınıstri Lıýdmıla Bıýrabekova statıstıkalyq málimetterge toqtaldy.

«Vaktsınalaý ınfektsııalyq aýrýlardan qorǵanýdyń tıimdi ádisi bolyp otyr. Dúnıejúzilik densaýlyq saqtaý uıymy málimetinshe, ekpe jasaý jyl saıyn 3 mln-nan adamnyń ómirin qorǵaıdy», - dedi Lıýdmıla Bıýrabekova.