Qazaqstanda vaktsına jetkizý kestege sáıkes júrgizilip jatyr – QR DSM

NUR-SULTAN. QazAqparat – Qazaqstanda vaktsına jetkizý kestege sáıkes júrgizilip jatyr. Bul týraly QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Qazirgi ýaqytta Qazaqstanda vaktsına jetkizý kestege sáıkes júrgizilip jatqanyn atap ótý óte mańyzdy. Búginde óńirlerge shamamen 6,2 mln vaktsına dozasy jetkizildi. Qazir 2 587 884 adam 1-komponentti aldy. Bul ekpe alýǵa jatatyn halyqtyń 26 paıyzyn quraıdy. Ekinshi komponent 1 480 309 adamǵa salyndy», - dedi mınıstr Ortalyq kommýnıkatsııalar qyzmetindegi baspasóz máslıhaty barysynda.

Onyń dereginshe, respýblıkada vaktsınanyń 1 mln-nan astam birinshi jáne 1 mln-nan astam ekinshi komponent qaldyq dozasy bar.

«Jetkizý kestesi naqty bekitilgen. Biz vaktsınany jaramdylyq merzimimen kezeń-kezeńmen alyp jatyrmyz. Qazirge deıin úlken úgit jumysy júrgizildi. Óńirlermen, memlekettik organdarmen birge aımaqtyq jáne ortalyq buqaralyq aqparat quraldarynda 3,5 myńnan astam jarııalanym, 17 myń materıal jaryq kórdi», - dedi Alekseı Tsoı.