Qazaqstanda vahta jumysshysyna tólenetin eń joǵary jalaqy qandaı
ASTANA. QazAqparat - HeadHunter onlaın platformasy Qazaqstandaǵy vahtalyq ádispen jumystyń 2022 jylǵy qorytyndysyn shyǵardy, dep habarlaıdy QazAqparat.
2022 jyly jalpy el boıynsha búkil bos jumys oryndarynyń shamamen 4% nemese 20 myńnan astamy vahtalyq jumys boldy.
Vahtamen isteıtin qyzmetkerlerge eń úlken suranys Atyraý oblysynda tirkeldi - vakansııanyń 16% osynda. Odan keıin Qaraǵandy (12%) jáne Almaty (7%) tur.
Vahtalyq jumys izdegender ishinde eń belsendisi Astanada - 27%. Jumys izdeýden Almaty, Aqtóbe jáne Aqtaý vahtashylary da qalyspaıdy — túıindemeniń 7-12% osy qalalarǵa tıesili.
Vahta qyzmetkerlerine eń úlken suranys myna salalarda:
- qurylys, paıdalanýǵa berý, jobalaý
- óndirýshi sala
- metallýrgııa, metall óńdeý.
Alaıda, basqa mamandyq ókilderine de jumys kóp, olar - aspazdar, kúzetshiler, kútýshiler, baǵdarlamashylar, dárigerler, tipti satýshylarǵa da vahtalyq usynystar bar.
2022 jyly vahta jumysshysyna orta eseppen 350 myń teńge jalaqy usynyldy, bul - el boıynsha ortasha kórsetkishten joǵary.
«Eń qymbat» vahta jumysynyń reıtıngin Atyraý munaı-gaz salasyndaǵy jobalaý ınjeneri bastap tur - oǵan kompanııa 1 600 000 teńgeden asa eńbekaqy tóleýge daıyn.
Ekinshi orynda - Teńiz kentindegi kásiporynda EQ, QT jáne QOQ boıynsha menedjer (aılyq 1 500 000 teńgeden joǵary).
Úshinshisi - Qaraǵandyda tehnologııalyq jabdyqtar men qubyrlardy dánekerleýshi, jalaqysy 1 300 000 teńgeden bastalady.
