Qazaqstanda vagondary sýyq tasymaldaýshy kompanııaǵa 1,9 mln teńge aıyppul belgilendi

ASTANA. QazAqparat - Vagondary sýyq jáne nashar qyzmet kórsetilýine baılanysty temirjolda jolaýshy tasymaldaýshy kompanııaǵa aıyppul salynady, dep habarlaıdy QazAqparat QR IDM-nyń baspasóz qyzmetine silteme jasap.

Mınıstrlikke qarasty Kólik komıtetiniń komıssııasy elimizdegi jolaýshy poıyzdaryn tekserip jatyr. Astana-Qostanaı ýchaskesinde «Túrksib Astana» tasymaldaýshysynyń №43/44 Almaty-Qostanaı baǵytyndaǵy poıyzy tekserilgen.  

«Nátıjesinde QR Ultyq standart talaptary oryndalmaǵan 32 fakti anyqtalǵan: vagon syrtynyń, jolaýshylar poıyzynda qyzmet kórsetýdiń talapqa saı bolmaýy, terezelerdiń sańylaýy bolýy jáne t.b. Budan bólek, jolaýshylar birqatar vagondardyń salqyn ekenin aıtyp shaǵymdanǵan. Tekserý qorytyndysy boıynsha «Túrksib Astana» JShS-na 1,9 mln. teńgeden astam aıyppul salý josparlanyp otyr», delingen habarlamada.

Mınıstrliktiń baspasóz qyzmetiniń málimetinshe, tekserý aktileri kemshilikterdi joıý jáne budan bylaı buzýshylyqtarǵa jol bermeý úshin tasymaldaýshyǵa jiberiledi.

Komıssııalyq tekseris ári qaraı jalǵasýda.