Qazaqstanda ujymdyq ımmýnıtet qashan qalyptasady – ımmýnolog jaýap berdi
NUR-SULTAN. QazAqparat – Belgili allergolog-ımmýnolog Rafaıl Rozenson pandemııanyń aıaqtalý yqtımaldyǵyna qatysty pikir bildirdi, dep habarlaıdy QazAqparat.
«Biz pandemııalyq jaǵdaı aıaqtalǵan nemese aıaqtalýǵa jaqyn úsh el bar ekenin bilemiz. Bul elderdiń tájirıbesi neni kórsetti? Vaktsına alǵan adamdardyń 70%-yna jetkennen keıin aýrý juqtyrý kórsetkishi toqtady (Izraıl) nemese 0-ge jaqyndap keledi (AQSh jáne Ulybrıtanııa). Mysaly, búginde Izraılde 40-qa jýyq adam reanımatsııada jatyr. Al bir jyl buryn budan áldeqaıda kóp adam aýrýhanada jatqan edi», - dedi Rafaıl Rozenson Densaýlyq saqtaý mınıstrligi uıymdastyrǵan dáriste.
Sarapshy Italııa men Ispanııadaǵy, AQSh-taǵy jaǵdaılarǵa da toqtaldy.
«Byltyr Italııa men Ispanııada bir ýaqytta ondaǵan myń adam aýyrǵanyn bilesizder. Olar vaktsınalaýdy birinshi bolyp bastady da, naýryz aıynda ekpe alǵandardyń úlesi 65%-ǵa jetti. Sodan keıin syrqattaný kórsetkishi azaıyp keledi. AQSh-ta vaktsınalaý qańtar aıynda bastaldy. Al mamyrda aıtarlyqtaı jetistikterge jetti. Búginde olardyń shamamen 70%-y ekpe alǵan. Sonymen qatar, aýrý jaǵdaıy eń tómengi kórsetkishterge jaqyndap keledi. Brıtandyqtar da olardy ókshelep jetip qaldy», - dedi ımmýnolog.
Allergolog ınfektsııany tek jappaı vaktsınatsııa arqyly jeńýge bolatynyna senim bildirdi.
«Vaktsınaǵa qarsylar qansha aıqaılasa da, álem halyqtyń 75%-dan astamy vaktsına alsa, mýtatsııalanǵan vırýsty jeńetinin kórsetti. Óıtkeni vırýstyń tizbegi úziledi. Aýrý juqtyrý kórsetkishi qulasyn desek, eń bolmaǵanda 70-75 paıyz halyq vaktsına alýy kerek. Meniń bilýimshe, A.Tsoı myrza 1 maýsymda bergen esebinde 3,2 mıllıon qazaqstandyq vaktsına alǵanyn málim etti. Meniń túsinýimshe, qazir bizde aıyna 2 mıllıon adamdy vaktsınalaý múmkindigi bar. Sonda ujymdyq ımmýnıtettiń 60%-dyq kórsetkishine qol jetkizý úshin 11 mln adam qajet bolsa, biz qyrkúıek aıynyń sońyna deıin osy mejege jetemiz», - dep túıindedi Rafaıl Rozenson.
