Qazaqstanda ujymdyq sharttar sany 11 myńnan astamǵa artty
ASTANA. KAZINFORM — Qazaqstanda jumys berýshi men qyzmetkerler arasyndaǵy kelisimder kóbeıdi, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Qazaqstanda jumys berýshi men qyzmetkerler arasyndaǵy ózara túsinistik pen kelisimge negizdelgen eńbek qatynastary keńeıip keledi. 2026 jyldyń 1 tamyzyndaǵy jaǵdaı boıynsha elimizde 19 683 ujymdyq shart tsıfrlandyryldy. Ótken jyldyń osy kezeńimen salystyrǵanda kórsetkish 11 myńnan astam kelisimge ósken.
Áleýmettik áriptestikti damytý — eńbek salasyndaǵy memlekettik saıasattyń negizgi baǵyttarynyń biri. Tájirıbe kórsetkendeı, jumys berýshi men qyzmetkerler arasynda turaqty ári ashyq dıalog ornasa, eńbek daýlarynyń aldyn alýǵa, jalaqyǵa qatysty máselelerdi ýaqytynda sheshýge jáne jumysshylar úshin turaqty jaǵdaı jasaýǵa bolady.
— Ujymdyq sharttardy tsıfrlyq formatqa kóshirý taraptardyń óz mindetterin qalaı oryndap jatqanyn baqylaýdy jeńildetedi. Sonymen qatar bul memlekettik organdarǵa eńbek qatynastarynyń jaǵdaıyn jedel baqylap, qajetti sharalardy ýaqytynda qabyldaýǵa múmkindik beredi, — deıdi mamandar.
Búginde ujymdyq shart jaı ǵana resmı qujat emes. Ol jumys berýshi men qyzmetkerler arasyndaǵy eńbek qatynastaryn naqty retteıtin mańyzdy quralǵa aınalyp otyr. Qujatta jalaqy tóleý, eńbek qaýipsizdigi, kásibı oqytý, qyzmetkerlerdi áleýmettik qoldaý jáne taraptar arasynda túsinispeýshilik týyndaǵan jaǵdaıda ony sheshý tártibi boıynsha qosymsha kepildikter qarastyrylýy múmkin.
Áleýmettik áriptestiktiń damýy ujymdyq eńbek daýlarynyń azaıýyna da áser etip otyr. Jumys berýshiler týyndaǵan máselelerdi birden shıeleniske jetkizbeı, kelissóz arqyly sheshýge kóbirek kóńil bólýde. Bul eńbek ujymyndaǵy turaqtylyqty saqtaýǵa septigin tıgizedi.
Eńbek jáne halyqty áleýmettik qorǵaý mınıstrligi ujymdyq sharttar arqyly eńbek qatynastaryn retteý jumystaryn odan ári jalǵastyrady. Aldaǵy ýaqytta tsıfrlandyrýdy damytýǵa, áleýmettik áriptestik júıesimen qamtylǵan kásiporyndar sanyn arttyrýǵa jáne eńbek daýlarynyń aldyn alý tetikterin jetildirýge basymdyq berilmek.
Ujymdyq sharttardyń kóbeıýi jumys berýshi men qyzmetker arasyndaǵy ózara senimdi nyǵaıtyp, eńbek mádenıetin qalyptastyrýǵa jáne bıznestiń áleýmettik jaýapkershiligin arttyrýǵa yqpal etedi.
Budan buryn ujymdyq shartta jumysshynyń qandaı quqyqtary jazylatyny aıtyldy.
