Qazaqstanda úzdik ÚEU-lar 4,5 mln teńge syılyqaqy alady

ASTANA. QazAqparat - QR Qoǵamdyq damý mınıstrligi úkimettik emes uıymdarynan syılyqaqy alýǵa ótinimderdi qabyldaýdy jalǵastyrýda. Bul týraly atalǵan vedomstvonyń baspasóz qyzmetinen málim boldy, dep habarlaıdy QazAqparat.

«Syılyqaqy mólsheri 2 000 AEK-ti (4,5 mln teńgeden asa) quraıdy.

Syılyqaqy áleýmettik máselelerdi sheshýge úles qosqan úkimettik emes uıymdarǵa 15 baǵyt boıynsha beriledi. Konkýrsqa Qazaqstan Respýblıkasynyń aýmaǵynda tirkelgen jáne ÚEU derekter bazasyna málimetterin ýaqtyly tapsyryp otyratyn úkimettik emes uıymdar qatysa alady. Bir ÚEU bir mezette birneshe nomınatsııa boıynsha syılyqaqyǵa úmitker bola almaıdy», - dep naqtylanǵan mınıstrlik málimetinde.

Úkimettik emes uıymdardyń baıqaýǵa qatysý týraly ótinishteri Azamattyq qoǵam isteri komıtetine jiberilýi tıis. Baıqaýǵa qatysý úshin ótinish jáne saýalnama nysany, syılyqaqyǵa úmitker uıymnyń qyzmetiniń sıpattamasy, qoǵamdastyq ókilderiniń usynymdary (ÚEU) jáne memlekettik organdardyń  usynymdary, sondaı-aq úkimettik emes uıymdardy memlekettik tirkeý týraly quryltaı qujattarynyń jáne kýáliginiń kóshirmeleri, bank shotynyń bolýy týraly anyqtama bolýy kerek. Qujattar aǵymdaǵy jyly 1 qyrkúıekke deıin qabyldanady. 

Úkimettik emes uıymdarǵa syılyqaqy - úkimettik emes sektordy memlekettik qoldaýdyń bir túri. Syılyqaqy azamattyq qoǵamdy damytý, onyń áleýetin arttyrý jáne qoǵamdyq uıymdardy yntylandyrý maqsatynda qaıtarymsyz beriledi.

Baıqaý jyl saıyn uıymdastyryady jáne bıyl ekinshi ret ótkizilip otyr. Byltyr 59 ÚEU ókilderi syılyqaqy aldy.