Qazaqstanda úzdik muraǵatshylar anyqtaldy
Arhıvte jumys jasaý - úlken yjdaǵattylyq pen bilimpazdyqty talap etedi.
«Baıqaý tek bilim alatyn alań emes, jas órenderge óz talanttary men múmkinshilikterin jarııa etetin orynǵa aınaldy. Eń alǵash, 2015 jyly QR Prezıdenti arhıvi eldegi úzdik muraǵatshyny anyqtaý týraly bastama usyndy. Qazaqstannyń ár óńirindegi uıymdar buǵan qoldaý bildirdi. Bul baıqaý eldegi arhıvısterdiń mereıin arttyryp, jas mamandardyń biliktiligin arttyrýǵa septigin tıgizedi degen senimdemin», - dedi Almaty ortalyq memlekettik arhıviniń dırektory Abzal Botanov.
Saıysta Qazaqstannyń túkpir-túkpirinen kelgen mamandar baq synady.
Atap aıtqanda, QR Prezıdenti arhıvi, QR Mádenıet jáne sport mınıstrligi Ortalyq memlekettik arhıvi, QR Mádenıet jáne sport mınıstrligi ortalyq memleketik ǵylymı tehnıkalyq qujattama arhıvi, Almaty qalasy men Atyraý, Shyǵys Qazaqstan, Jambyl, Ońtústik Qazaqstan jáne Soltústik Qazaqstan oblystarynyń memlekettik arhıvteriniń komandalary baq synady.
«Qatysýshylar eki kezeńnen ótti. Birinshisinde olardyń arhıv zańnamasy týraly bilimi tekserildi. Ekinshi kezeńde komandalardyń bilimi jáne kásibı sheberligi synǵa tústi»,- dedi Abzal Botanov.
Onyń aıtýynsha, mundaı baıqaý Memleket basshysynyń «Bolashaqqa baǵdar: rýhanı jańǵyrý» maqalasynda kóterilgen birqatar mindetterdiń oryndalýyna septigin tıgizedi ári eńbek resýrstarynyń sapasynyń artýyna, jas mamandardyń iskerlik belsendiligin arttyrýǵa sep bolady.
Eki kúnge sozylǵan saıysta Qyzylorda oblysynyń jas arhıvshileri birinshi orynǵa laıyq dep tanyldy.
Ekinshi oryndy Soltústik Qazaqstan oblystyq Mádenıet, arhıvter jáne qujattama basqarmasynyń jáne Jambyl oblystyq mádenıet basqarmasynyń komandalary bólisti.
Úshinshi oryn Jezqazǵan memlekettik arhıviniń qyzmetkerlerine buıyrdy.
