Qazaqstanda «úzdik memlekettik qyzmetshi» tósbelgisi bekitilmek
ASTANA. 9 shilde. QazAqparat - Elimizdiń Memlekettik qyzmet isteri jónindegi agenttigi «úzdik memlekettik qyzmetshi» tósbelgisin belgileýdi usynady.
Bul usynysty búgin Aqordada ótken Vedomstvolyq nagradalar jónindegi geraldıkalyq komıssııanyń otyrysynda atalǵan vedomstvonyń basshysy Álıhan Báımenov jasady.
«Geraldıkalyq komıssııanyń jumys organyna 10 memlekettik organnan 21 usynys tústi. Búgingi otyrysta osy memlekettik organdardyń 20 usynysyn engizip otyrmyz. Onyń ishinde 7 memlekettik organ jańa tósbelgi úlgilerin, 1 memlekettik organ jańa medal úlgisin ázirleýde. Al 2 memlekettik organ qoldanystaǵy vedomstvolyq nagradalardy pysyqtaýǵa qatysty usynystaryn joldady.
Jalpy, kelip túsken usynystardy qoldaýǵa bolady dep sanaımyz. Bul rette, 5 memlekettik organnyń vedomstvolyq nagradalarynyń ataýlaryn birizdilikke keltirý maqsatynda Muhtar Abraruly sizben kelisken baǵytta olardy 2-shi, 3-shi qosymshadaǵy kestege sáıkes pysyqtaý usynylady, ıaǵnı úzdik degen ataýǵa keltirý», - dedi ol.
Agenttik basshysynyń atap ótýinshe, sonymen qatar, Statıstıka agenttiginiń vedomstolyq nagradaǵa qatysty usynysy Prezıdent Jarlyǵymen bekitilgen vedomstvolyq nagradalarmen marapattaý qaǵıdalaryna sáıkes kelmeýine baılanysty kelesi otyrysta qaralmaq.
Sondaı-aq agenttiktiń tóraǵasy retinde úzdik memlekettik qyzmetshi tósbelgisin belgileýdi usynatyndyǵyn atap ótken Á.Bámenov: «Konstıtýtsııada bizde «memlekettik qyzmetker» emes «memlekettik qyzmetshi» bolyp bekitilgen eken. Sondyqtan qyzmetshi degen ataýmen «úzdik memlekettik qyzmetshi» tósbeligsin usynyp otyrmyz»,- dedi.
