Qazaqstanda úzdik dárigerlerge 1000 AEK somasynda birjolǵy tólem beriledi

ASTANA. QazAqparat – Búgin Májilistiń jalpy otyrysynda densaýlyq saqtaý máselesine arnalǵan zań jobasyn talqylaý kezinde Densaýlyq saqtaý mınıstri Ajar Ǵınııat medıtsına nemese farmatsevtıka qyzmetkerlerine qatysty jazalaýdy jeńildetý usynylyp otyrǵanyn aıtty, dep habarlaıdy QazAqparat tilshisi.

Aıta keteıik, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.

«Zań jobasy medıtsına qyzmetkerleriniń mártebesin kóterýge jáne olardy áleýmettik qoldaýǵa, qurmetti ataqtar berýine baǵyttalǵan», - dedi Ajar Ǵınııat.

Qujat aıasynda jylyna bir ret 1000 aılyq eseptik kórsetkish somasynda birjolǵy tólem berile otyryp, medıtsına qyzmetkeriniń asa úzdik jetistikteri men aıryqsha eńbegi úshin «Qazaqstannyń eńbek sińirgen dárigeri» qurmetti 3 ataǵyn bekitý eskerilgen.

Sonymen qatar, «Mamandyq úzdigi» respýblıkalyq konkýrsy ótkiziledi. Bul turǵyda 500 aılyq eseptik kórsetkish somasynda 17 jeńimpazǵa birjolǵy yntalandyrý tólemaqysy berilmek.