Qazaqstanda uıaly telefon nómirimen mezettik tólem júıesi iske qosyldy
QR Ulttyq bankiniń baspasóz qyzmeti taratqan aqparatqa sáıkes, «Suńqar» júıesine túrli bankter qatysady. Bul bank klıentteri Qazaqstan boıynsha ózara mezettik tólemder men aqsha aýdarymdaryn júrgizýge múmkindik aldy.
Bul rette jeke tulǵalar arasynda aqsha aýdarý úshin qarapaıym da qolaıly sáıkestendirýshi - mobıldi telefon nómiri paıdalanylady. Ony tólem kartochkasyna nemese aǵymdaǵy banktik shotqa, bolmasa elektrondyq ámııanǵa baılanystyrý qajet.
«Suńqar» júıesindegi qyzmetterdi Qazaqstan bankteri ózderiniń mobıldi qosymshalary nemese Internet-bankıng júıesi arqyly júzege asyrady. Qazirgi ýaqytta mezettik tólemder júıesi arqyly «Bank TsentrKredıt» AQ, «Altyn Bank» AQ (China CITIC Bank Corporation Limited EB) jáne «Eýrazııalyq Bank» AQ qyzmet kórsetedi. 2019 jyly 10-nan asa bank júıege qosylýdy josparlap otyr. Mezettik tólemder men aýdarymdar boıynsha klıentterge arnalǵan tarıf saıasatyn bankter derbes aıqyndaıdy.
«Birinshi kezeńde «Suńqar» júıesinde jeke tulǵalar arasynda aqsha aýdarýǵa (P2P-aýdarymdar), onyń ishinde túrli qatysýshy bankterdegi óz shottary (salymdar, brokerdegi ınvest-shotty tolyqtyrý jáne basqalar) boıynsha júrgizýge bolady. Júıede kórsetiletin qyzmetterdiń damýyna qaraı zańdy tulǵalar, jeke kásipkerler qyzmet kórsetetin bankteri arqyly da arnaıy jabdyqty ornatpaı-aq taýarlar jáne kórsetilgen qyzmetter úshin óz paıdalaryna mezettik tólemderdi qabyldap, jeke tulǵalarmen esep júrgize alady. Atap aıtqanda, «Suńqar» júıesi arqyly QR-kodtardy skanerleý arqyly uıaly telefonmen bólshek saýdada esep aıyrysýǵa bolady. Qazaqstanda mezettik tólemder júrgizý júıesin engizý halyqqa jáne bıznes sýbektilerine tólemderdi qoljetimdi aqy tóleý quraly men qashyqtan qol jetkizý arnalary arqyly kez kelgen jerde, kez kelgen ýaqytta tólemder júrgizýdiń ámbebap alańyn jasaýǵa baǵyttalǵan», - delingen baspasóz habarlamasynda.
