Qazaqstanda «Uıaly baılanys sapasyn halyqtyq baqylaý» mobıldik servısi jumysyn bastady
ASTANA. QazAqparat - «Uıaly baılanys sapasyn halyqtyq baqylaý» mobıldik servısi uıaly baılanys jáne mobıldik ınternet jumysynda túrli aqaýlar paıda bolǵan jaǵdaıda tikeleı QR IDM Baılanys, aqparattandyrý jáne aqparat komıtetine jáne «Memlekettik tehnıkalyq qyzmeti» RMK pikir jiberýge múmkindik beredi.
Servısti paıdalaný úshin memlekettik organdardyń halyqtan keri baılanysty alý maqsatynda qurastyrylǵan «Ashyq dıalog» qosymshasyn júkteý qajet. Qosymsha elektrondyq úkimet portalynyń «Ashyq úkimet» modýliniń bóligi bolyp tabylady, dep habarlaıdy QR IDM BAAK baspasóz qyzmetinen.
«Halyqtyq baqylaý» arqyly uıaly baılanysty usyný sapasy týraly pikir avtorlanýsyz jáne jeliniń bar nemese joq ekenine baılanyssyz jiberiledi. Geopozıtsııa, kún jáne ýaqyt sııaqty parametrlerdi jınaý avtomatty túrde iske asyrylady, al pikir aǵymdaǵy ornalasqan jerden jáne basqa jerden de jiberiledi. Sonymen qatar, paıdalanýshy qosymsha aqparatty, mysaly, jeliniń tehnologııasyn, sıgnal deńgeıin jáne basqa derekterdi de usyna alady», - dep baılanys jáne aqparattandyrý salasyn baqylaý basqarmasynyń bastyǵy Rýslan Ábdiqalyqov habarlady.
Qosymsha úsh tilde jumys isteıdi: qazaq, orys jáne aǵylshyn tilderinde.
Qazir «Ashyq dıalogty» Android platformasyndaǵy smartfon ıeleri júkteı alady, al jyldyń sońyna deıin ol iOS pen Windows úshin qoljetimdi bolady.
«Qazirgi tańda qosymsha tájirıbeli paıdalanýǵa berildi, sondyqtan da bizge paıdalanýshylardyń oıy men usynystaryn alý óte mańyzdy. Usynystardy Playmarket pen áleýmettik jelilerdegi elektrondyq úkimet betterinde qaldyrýǵa bolady» - dep tolyqtyrdy Rýslan Ábdiqalyqov.
Jaqyn arada qosymshada memlekettik organdardyń blog-tuǵyrnamasy paıda bolady, onyń kómegimen azamattar ózderiniń uıaly telefondary arqyly tikeleı mınıstrler men ákimderge suraqtar qoıa alady.
