Qazaqstanda uıaly baılanys qyzmetiniń quny qansha
ASTANA. KAZINFORM - Qazaqstanda uıaly baılanys tarıfi 1 090 teńgeden bastalyp, aıyna 19 999 teńgege deıin jetedi. Operatorlar qarapaıym túrinen sheksiz lımıtke deıin múmkindik beretin arnaıy toptamany da usynady. Kazinform anenttiginiń tilshisi tıimdisin izdep kórdi.
Keıingi kezderi Qazaqstanda uıaly baılanysty tutynýshylar qatary turaqty ósip keledi. Ulttyq statıstıka bıýrosynyń derekterine súıensek, 2025 jyldyń qańtar-qazan aılary aralyǵynda abonent sany 27,3 mıllıonǵa jetip, ósim 4,9% qurady. Al mobıldi ınternet tutynýshylar sany 19,3 mıllıondy qurap, mundaǵy ósim 2,8% boldy. Naqtyraq aıtqanda tórt jylda abonent sany shamamen 3 mıllıonǵa artty. 2021 jyly 24,28 mln bolsa, 2025 jyly 27,32 mln-ǵa jetti.
Búginde uıaly baılanys operatorlarynyń qyzmet quny qansha jáne olar ne usyna alady?
Eń tıimdi usynysty Altel berip otyr. Munda «Arnaý» tarıfiniń quny - 4 090 teńge. Operator 15 GB jáne ózge baılanys nómirlerine 50 mınýt tarıf beredi. Sonymen birge 5 190 teńge turatyn tarıfte ózge nómirlermen baılanys úshin 250 mın usynady. Al 5 470 teńge bolatyn tarıfte áleýmettik jelini qaraý tegin. Eń qymbaty - 6 670 teńge. Munda 45 GB jáne sheksiz baılanys bar. Aıta keteıik, bul tarıfter 5G jelisi kezinde qoldanylmaıdy.
Sonymen birge bul operatorda nusqaýshy tarıfi qarastyrylǵan. Máselen sheksiz ınternet quny 8 200 teńge bolsa, 1 590 teńgege 250 mınýtty satyp alýǵa bolady. Al qala ishindegi telefonǵa 30 mınýttyq qońyraý shalý quny – 690 teńge. Arnaıy usynystar da bar. Máselen YouTube/Twitch/TikTok — 690, Instagram/Facebook/VK — 490, Telegram/WhatsApp/Viber — 290 teńge. Tolyq toptama quny – 11 950 teńge.
Altel operatorynda «Januıa» paketi bar. Munda 2-5 SIM-karta beredi. Internetti sheksiz paıdalanyp, Altel/Tele2 nómirlerine de kez kelgen ýaqytta qońyraý shalýǵa bolady. Sonymen birge ózge operatorlardyń baılanys nómirine, qala ishindegi telefonǵa 900 mınýt beredi. Bul tarıfte 200 telearnany qalap, onlaın-kınoteatr qyzmetin qosýǵa múmkindik bar. Tarıf quny aıyna – 11 990 tg (2 SIM) jáne 15 990 tg (5 SIM).
Activ tarıfi budan sál joǵary. Munda baǵa 4 590 teńgeden bastalady. Tarıfte 10 GB, ózara baılanys tegin jáne ózge uıaly baılanys operatorlary men qala nómirine 100 mınýt qosady. Taǵy bir tarıfiniń quny - 6 590 teńge. 40 GB jáne ózge baılanys operatorlarynyń telefonyna 250 mınýt usynady. Bul tarıfdiń taǵy bir artyqshylyǵy bar. Ýaqytynan buryn qaıta qosylsa, ınterneti eki eselenedi, 5G jelisi tegin jáne gıgabaıttardy ózgege berýge múmkindik jasalǵan. Tarıfke taǵy 990 teńge qossa Instagram, TikTok, YouTube jáne ózge de áleýemettik jelilerdi tegin qoldanýǵa bolady. Otbasylyq tarıf quny 12 690 teńgeden (4 nómir) bastalyp, 19 690 teńgege (11 nómir) deıin jetedi. Bárinde de ınternetti sheksiz qoldanýǵa bolady. Al baılanys nómirine habarlasý 300/30 jáne 700/70 dep belgilengen. Mundaǵy ár nómirge lımıt bólek-bólek beriledi. Alǵashqy úsh aıda 50% jeńildik qarastyrylǵan.
«Imba» tarıfine bólek toqtalý kerek. Baǵasy – 4 990 nemese 3 5 990 teńge. WhatsApp, bilim alýǵa arnalǵan platformalar, jeli arasyndaǵy baılanys jáne 5G tegin. Al áleýmettik jelige 20 nemese 40 GB usynady. Tarıftiń ózgesheligi – mektep oqýshysynyń óte jaqsy baǵasy ınternetti tegin tutynýǵa múmkindik beredi. Bul tarıfke qosylǵan kezde 500 nemese 1000 ımbaks esepteledi. Keıin mektep oqýshysy 1 000 nemese 1 500 taba alady. ıAǵnı kundelik.kz platformasy arqyly ár 10 ballǵa 100 ımbaks esepteledi. Osy arqyly lımıtti arttyryp, qosymysha gıgabaıttar alýǵa bolady.
Kcell baǵasy odan joǵary. Munda eń arzan tarıf quny 4 990 teńgeden bastalady. Bul tarıfte 18 GB, ózge operatorlarǵa 180 mınýt jáne qalalyq telefon nómirlerine 10 mınýt beredi. Al áleýmettik jelilerdi sheksiz qoldaný úshin 1 990 teńge tóleıdi. Baǵasy odan joǵary tarıfte bul qyzmet quny 990 teńge dep belgilengen. Eger aıyna 10 990 teńge tóleseńiz, sheksiz ınternetti, ózge operatorlarǵa 480 mınýtty jáne qalalyq telefon nómirlerine 40 mınýtty paıdalanýǵa bolady.
Kcell-diń resmı portalynan otbasylyq tarıf týraly aqparatty tappaısyz. Biraq buǵan deıin Kcell men Activ ortaq otbasylyq tarıf shyǵarý týraly habarlaǵan edi. Sholý jasaý kezinde eki brendtiń usynysy bir-birine sáıkes keledi dep esepteldi.
Tele2 operatorynyń baǵasyna keler bolsaq, «Tıimdi» toptamasyndaǵy «Pro» tarıfi – 5 790 teńge. Onda 25 GB, jeli arasyndaǵy sheksiz balanys jáne ózge operatorlarǵa 150 mınýt bar. Bul tarıf 5G jelisine berilmeıdi. Eń qymbat tarıf — «Unlim». Baǵasy – 11 490 teńge. Munda ınternet sheksiz, ózge operatorlardyń telefon nómirine qońyraý shalýǵa 350 mınýt usynady. Sonymen birge shetelge qońyraý shalý úshin 30 mınýt qosa esepteledi. Qosymsha usynystar da qarastyrylǵan. Máselen lımıt bitse ózge uıaly nómirlerge telefon shalý mınýtyna 21, qalalyq telefon nómirine habarlasý 25 teńge. Mektep oqýshylary úshin bilim platformalary tegin. Al «Jeńildik» tarıfi – 1090 teńge. Munda 7 GB beriledi jáne ózara baılanys tegin.
Tele2 birneshe jeńildik qarastyryp otyr. Eger 2 adam bir mezette osy operatordy tańdasa 5%, 6-7 adamǵa 20% jeńildik bar. Sonymen birge alǵashqy úsh aıda kez kelgen tarıfke qosylý quny 20% arzanǵa túsedi. Aıtyp óteıik, ózara 1 GB = 10 mınýt = 50 SMS berýge bolady. Otbasylyq tarıf quny 12 990 teńgeden bastalyp, 17 490 teńgege deıin jetedi. Munda sheksiz ınternet bar jáne ózge operatorlarǵa qońyraý shalý úshin 500-1000 mınýt beredi. Oǵan 300-700 SMS jáne 200 TV arna qosylady.
Beeline – elimizdegi eń qymbat baılanys operatory. Munda eń arzany – 5 999 teńge. Oǵan 10 GB, ózge baılanys operatorlarynyń telefon nómirine 100 mınýt jáne 50 SMS beriledi. Al quny 7 990 teńge bolatyn tarıfte 25 GB, ózge operatorlarmen baılanysqa 200 mınýt qarastyrylǵan. Otbasylyq tarıf quny - 13 999 – 19 999 teńge aralyǵynda. Onda 2-6 nómir, sheksiz ınternet pen ózge baılanys operatorlarynyń uıaly baılanys nómirine 300-700 mınýt beriledi. Barlyq tarıfte seriktesteriniń qyzmeti qosylǵan. Onda BeeTV onlaın kınoteatry, Simply tsıfrlyq kartasy, Hitter mýzykalyq servısi men BeeCloud saqtaý orny bar.
Sonymen birge qoljetimdi tarıf te bar. «Mega áleýmettik» tarıf - 16 GB, ózara baılanys sheksiz jáne ózge operator nómirlerine 160 mınýt. «Oqý» tarıfi stýdentter men oqýshylarǵa arnalǵan. Kúnine 300 MB úshin 200 teńge tóleýge bolady. Qazaqstan boıynsha barlyq nómirge qońyraý shalý quny mınýtyna 25 teńge.
Aıta keteıik, buǵan deıin úıdegi ınternet men jańa smartfon baǵasy týraly jazyldy.
Sonymen birge jylytý maýsymy aldynda qaladaǵy tarıfti, qysqa arnalǵan aıaq kıim baǵasy men lımon men apelsın qunyn bildik.