Qazaqstanda uıaly baılanys qansha turady

Qazaqstanda uıaly baılanys qyzmetin bes negizgi operatorlyq brend usynady: Tele2, Kcell, activ, Beeline jáne Altel. Jospar quny qosylǵan mobıldi ınternetke, qońyraýǵa arnalǵan mınýttar men qosymsha qyzmetterge baılanysty. 

Salystyrý úshin abonentterdiń basym bóligine arnalǵan qoljetimdi tarıfter tańdap alyndy. Oqýshylar, stýdentter men zeınetkerler jekelegen sanatta bolǵandyqtan olarǵa arnalǵan arnaıy usynystarǵa toqtalmadyq. Sondaı-aq qosylý kezindegi ýaqytsha jeńildikter esepke alynǵan joq. Onyń ornyna standartty tarıfter quny negizge alyndy.
Tarıftik jospardy tańdaý kezinde jekelegen qajettilikterdi eskerý mańyzdy. Telefon arqyly jıi sóılesetinder qosylǵan mınýttar sanyna mán bergeni jón. Al mobıldi ınternetti kóbirek paıdalanatyndar trafık kólemine qaraǵany durys. Bul qajetsiz qyzmet úshin ústeme aqy tólep shyǵyndalmaýǵa múmkindik beredi.

Tele2: jeke tarıfter 5990 teńgeden bastalady

Tele2 qosylý úshin eki jeke tarıf usynady. Olardyń standartty quny — 5990 teńge jáne 7990 teńge. 5990 teńgelik tarıf lımıtsiz ınternet, Tele2 jáne Altel nómirlerine lımıtsiz qońyraýlar men basqa operatorlar úshin 100 mınýtty qamtıdy.

7990 teńgege de osyndaı qyzmetter toptamasy usynylady. Alaıda basqa operatorlardyń nómirlerine qońyraý shalýǵa beriletin mınýt sany 250-ge artyq. 
Operator sondaı-aq eki otbasylyq tarıfti usynady. 12790 teńgege eki nómirdi qosýǵa bolady. Oǵan lımıtsiz ınternet, Tele2 jáne Altel nómirlerine lımıtsiz qońyraýlar, basqa operatorlarǵa qońyraý shalýǵa arnalǵan 350 mınýt kiredi.

Ekinshi otbasylyq tarıf 16790 teńge turady jáne ol tórt nómirge arnalǵan. Ol da joǵarydaǵydaı qyzmet túrlerin qamtıdy, degenmen, basqa operatorlarǵa qońyraý shalý úshin 400 mınýt bólingen.

Kcell: 5999 teńgeden 12 999 teńgege deıingi tarıfter

Kcell úsh jeke tarıftik jospardy usynady. Eń qoljetimdisi aıyna 5999 teńgeden. Ol boıynsha 20 GB mobıldi ınternet, Kcell jáne activ nómirlerine lımıtsiz qońyraýlar, al basqa operator abonentterine 100 mınýt bólingen. 

Tanymal áleýmettik jelilerdi, messendjerler men beınehostıngterdi sheksiz paıdalaný múmkindigi qosymsha 1290 teńgege usynylady.

Kelesi tarıftiń quny — 7999 teńge. Ol 5G jelisinde sheksiz ınternetti, messendjerler men áleýmettik jelilerdi shekteýsiz paıdalanýdy, 50 GB mobıldi ınternetti jáne basqa operatorlardyń nómirlerine qońyraý shalýǵa arnalǵan 250 mınýtty qamtıdy.
Usynylǵan tarıfterdiń ishindegi eń qymbaty — 12999 teńge. Oǵan lımıtsiz ınternet, Kcell jáne activ nómirlerine lımıtsiz qońyraý, basqa operator abonentterine 350 mınýt qońyraý soǵý múmkindigi kiredi.

Kcell kompanııasynyń tarıftik jelisinde otbasylyq tarıfter qarastyrylmaǵan.
Activ: jeke jáne otbasylyq tarıfter

Activ alty tarıftik jospardy usynady, onyń úsheýi jeke, úsheýi otbasylyq. Eń tıimdi jeke tarıf aıyna — 4990 teńge. Oǵan 20 GB ınternet, Kcell jáne Activ nómirlerine lımıtsiz qońyraý, sondaı-aq basqa operatorlarǵa 100 mınýt kiredi.

6990 teńgege abonentterge lımıtsiz ınternet, basqa operatorlarǵa qońyraý shalýǵa arnalǵan 200 mınýt usynylady.

Eń qymbat jeke tarıf 9990 teńge turady. Onda basqa operatorlarǵa qońyraý soǵý mınýty 300-ge deıin ulǵaıtylǵan. 

Otbasylyq usynystardyń eń tómengi standartty baǵasy — 12690 teńge. Oǵan qosylý kezinde jeńildik qarastyrylǵan, alaıda salystyrý barysynda tolyq baǵasy eskeriledi. 12690 teńgelik tarıf tórt nómirge eseptelgen. Oǵan lımıtsiz ınternet, Kcell jáne activ nómirlerine lımıtsiz qońyraý, basqa operator abonentterine 300 mınýt, Qazaqstan boıynsha qalalyq nómirlerge qońyraý shalýǵa arnalǵan 30 mınýt kiredi. 

Kelesi otbasylyq tarıftiń quny — 14690 teńge. Ol segiz nómirdi qamtıdy, onyń ekeýi qurylǵylarǵa, al bireýi úı ınternetine arnalǵan. Basqa operatorlardyń nómirlerine qońyraý shalýǵa arnalǵan mınýt sany 500-ge, al qalalyq nómirlerge qońyraý shalýǵa arnalǵan mınýt sany 50-ge deıin ulǵaıtylǵan.

Eń qymbat otbasylyq tarıfke aıyna 19 690 teńge jumsaısyz. Ol 11 nómirge eseptelgen, onyń úsheýi qurylǵyǵa, bireýi úı ınternetine arnalǵan. Basqa operatorlardyń abonentterine qońyraý soǵý úshin 700 mınýt, qalalyq nómirlerge 70 mınýt bólingen. 
Beeline: 5999 teńgeden bastalatyn jeke tarıfter

Beeline usynatyn eń qoljetimdi jeke tarıftiń quny — 5999 teńge. Ol 25 GB mobıldi ınternetti, jeli ishindegi sheksiz qońyraýlardy jáne basqa operatorlardyń abonentterine qońyraý shalýǵa arnalǵan 100 mınýtty qamtıdy.

Quny 9999 teńge bolatyn tarıf sheksiz ınternet pen basqa operatorlardyń nómirlerine qońyraý shalýǵa arnalǵan 120 mınýtty qamtıdy. Alaıda 2027 jylǵy 1 qańtardan bastap ınternet-trafık kólemi 50 GB bolady.

12999 teńge abonenttik tólem úshin abonentterge Starlink Mobile qyzmetine qoljetimdiligi bar tarıf usynylady. Ol kádimgi mobıldi jeliniń qamtý aımaǵy joq jerlerde de baılanys ornatýǵa múmkindik beredi. Basqa operatorlardyń abonentterine qońyraý shalýǵa arnalǵan mınýt sany 150-ge deıin ulǵaıtylǵan.

Beeline usynatyn otbasylyq tarıfterdiń eń tómengi quny — 17999 teńge. Bul usynys eki nómirge arnalǵan jáne Starlink Mobile qyzmetin, sheksiz ınternetti, jeli ishindegi sheksiz qońyraýlardy, basqa operatorlardyń nómirlerine qońyraý shalýǵa arnalǵan 200 mınýtty jáne halyqaralyq qońyraýlarǵa arnalǵan 30 mınýtty qamtıdy. 2027 jylǵy 1 qańtardan bastap ınternet-trafık kólemi 120 GB bolady.

21999 teńgege tórt nómirdi qosýǵa bolady. Basqa operatorlardyń abonentterine qońyraý shalýǵa arnalǵan mınýt sany 400-ge deıin kóp.

Eń qymbat otbasylyq tarıftiń quny — 25999 teńge jáne ol alty nómirge arnalǵan. Tarıf aıasynda joǵaryda atalǵan sheksiz qyzmetter usynylyp, basqa operatorlardyń nómirlerine qońyraý shalýǵa 600 mınýt beriledi. 2027 jylǵy 1 qańtardan bastap ınternet-trafık kólemi 360 GB bolady.

Altel: 4490 teńgeden bastalatyn jeke tarıfter 

Qarastyrylǵan jeke tarıftik usynystardyń ishinde eń tómengi baǵa Altel-de tirkelgen — 4490 teńge. Oǵan 5G jelisinde sheksiz ınternet, 4G jáne 3G jelilerinde 25 GB ınternet-trafık, Altel jáne Tele2 nómirlerine sheksiz qońyraýlar, sondaı-aq basqa operatorlardyń abonentterine qońyraý shalýǵa arnalǵan 100 mınýt kiredi. Tarıf 5G jelisinde sheksiz ınternetti, 4G jáne 3G jelilerinde 25 GB ınternet-trafıkti, Altel men Tele2 nómirlerine sheksiz qońyraýlardy, sondaı-aq basqa operatorlardyń abonentterine qońyraý shalýǵa arnalǵan 100 mınýtty qamtıdy.

5490 teńgege 4G jáne 3G jelilerinde 40 GB ınternet pen basqa operatorlardyń nómirlerine qońyraý shalýǵa arnalǵan 200 mınýt usynylady.

5490 teńgege 4G jáne 3G jelilerinde 40 GB ınternet pen basqa operatorlardyń nómirlerine qońyraý shalýǵa arnalǵan 200 mınýt usynylady.

Altel usynatyn eń qymbat jeke tarıftiń quny — 6490 teńge. Ol jeli túrine qaramastan sheksiz ınternet pen basqa operatorlardyń abonentterine qońyraý shalýǵa arnalǵan 250 mınýtty qamtıdy.

Operatordyń eń qoljetimdi otbasylyq tarıfiniń quny — 11990 teńge. Alǵashqy úsh aıda tarıfti qosqan jaǵdaıda jeńildetilgen baǵa qoldanylady. Alaıda salystyrý barysynda standartty baǵa eskerildi. Tarıf úsh nómirge arnalǵan. Ol sheksiz ınternetti, jeli ishindegi sheksiz qońyraýlardy jáne basqa operatorlardyń abonentterine qońyraý shalýǵa arnalǵan 400 mınýtty qamtıdy. 

Kelesi otbasylyq tarıftiń quny — 14290 teńge jáne ol bes nómirge arnalǵan. Basqa operatorlardyń nómirlerine qońyraý shalýǵa 550 mınýt beriledi.
Eń qymbat otbasylyq tarıftiń quny — 19490 teńge jáne ol jeti nómirge arnalǵan. Tarıf aıasynda basqa operatorlardyń abonentterine qońyraý shalýǵa 750 mınýt usynylady.

Eń qoljetimdi tarıfter qaı operatorlarda?

Standartty baǵalardy salystyrý nátıjesinde qarastyrylǵan usynystardyń ishindegi eń qoljetimdi jeke tarıf Altel-de ekeni anyqtaldy. Onyń aılyq quny — 4490 teńge. Odan keıin Activ — 4990 teńge, Tele2 — 5990 teńge, al Kcell men Beeline 5 999 teńgeden usynady.
Otbasylyq tarıfter arasynda da eń tómengi baǵa Altel-de tirkelgen — úsh nómirge 11 990 teńge. Activ-te eń qoljetimdi otbasylyq tarıf tórt nómirge 12690 teńge, Tele2-de eki nómirge 12790 teńge, al Beeline-de eki nómirge 17999 teńge turady.

Sonymen qatar tarıfter qosylatyn nómirler sany, ınternet-trafık kólemi jáne qońyraý shalýǵa beriletin mınýt sany boıynsha erekshelenedi. Sondyqtan eń tómengi baǵa árdaıym naqty abonent úshin eń tıimdi sharttardy bildirmeıdi

Eske salaıyq, buǵan deıin biz Qazaqstannyń qaı óńirinde «úı sheberi» qyzmetin shaqyrý arzanyraq ekenin jazǵan edik.

Taǵy birde Qazaqstannyń ár óńirindegi soǵym baǵasyn zerttedik.