Qazaqstanda ýtıl alymy boıynsha ǵylymı zertteý júrgizý usynyldy

NUR-SULTAN. QazAqparat – Qazaqstanda ýtıl alymy stavkasynyń qalaı eseptelýi kerektigi jáne ol úshin ǵylymı zertteý júrgizýdiń mańyzdylyǵy aıtyldy, dep habarlaıdy QazAqparat tilshisi.

«Biz Úkimet pen mınıstrlikke qaıta óńdeýshilerdiń aǵymdaǵy shyǵyndaryn negizge ala otyryp, ýtıl alymdy qaıta esepteýdi usyndyq. Sonymen qatar ekinshi rettik resýrstarmen ne isteıtindigine qatysty másele tur. Ol degenimiz mys, alıýmınıı, bolat, qaldyq maı, dóńgelek, akkýmýlıator jáne taǵys basqa. Kóp jaǵdaıda olardy naryqqa ekinshi rettik materıaldyq resýrstar túrinde satyp jatady. Sondyqtan biz ǵylymı-zertteý jumystaryn júrgizýdi jáne qaıta óńdeýshilerdiń resýrstardy satýdan qandaı kiris alatyndyǵyn jáne olar qandaı shyǵyndar ákeletinin naqtylaýymyz qajet. Bul teńgerimdi qaıta qarap, bıznes úshin 30-40% rentabeldilikpen jaǵdaı jasaǵan jón», - dedi KazWaste qaldyqtardy basqarý Qazaqstan assotsıatsııasynyń basqarma tóraǵasy Shynbolat Baıqulov elordada ótip jatqan ekologııa taqyrybyna arnalǵan konferentsııa barysynda.

Onyń aıtýynsha, ýtıl alymdy resýrstardyń kádege jaramdylyǵyna qaraı belgilegen durys.

«Biz qazir ǵylymı-zertteý jumystaryn júrgizý qajettiligin alǵa tartyp otyrmyz. Bul naryqta kim jumys isteıtindigin, shyǵyndar men qaıta óńdeýdiń naqty úlesin anyqtaý úshin qajet. Jáne atalǵan sharany «Jasyl damý» memlekettik operatory jasaýy tıis dep esepteımiz. Mysaly, jeńil avtomobıldiń keıbir qaldyqtaryn qaıta óńdeý múmkin emes. Ol degenimiz polıýretandy qaptama, polıvınılhlorıd, onyń ishinen avtomobıldiń belgili bir bólikteri nemese túıinderi turady. Olardy alyp tastaý ekonomıkalyq turǵydan tıimsiz. Sondyqtan olardy aınalymǵa qaıtarý, qaýipsiz túrde alyp tastaý nemese sýbsıdııalaý kerek», - deıdi ol.

Buǵan deıin habarlaǵanymyzdaı elimizde qatty turmystyq qaldyqtardyń 22 paıyzy ǵana qaıta óńdeledi .