Qazaqstanda ustazdardyń ulttyq tsıfrlyq galereıasy ashyldy: Oǵan kez kelgen muǵalim qatysa alady
ASTANA. KAZINFORM — Qazaqstanda muǵalimderdiń kásibı beınesi men ustazdyq ustanymyn tanytatyn «Bilim beınesi» ulttyq tsıfrlyq galereıasy iske qosyldy. Jobaǵa eldiń kez kelgen óńirindegi pedagog qatysa alady.
Joba el ustazdarynyń fotosýreti men ustazdyq ustanymyn kópshilikke tanytýdy maqsat etedi. Al tsıfrlyq galereıaǵa kez kelgen muǵalim qatysa alady.
«Bilim beınesi» jobasy Bilim Group ulttyq tsıfrlyq bilim berý ekojúıesiniń bastamasymen júzege asyp otyr. Ekojúıeniń bas dırektory Aleksandr Savchenkonyń aıtýynsha, jobanyń maqsaty muǵalimderdiń ulttyq tsıfrlyq galereıasyn qalyptastyrýmen ǵana shektelmeıdi. «Bilim beınesi» Qazaqstannyń túrli óńirindegi pedagogterdi bir alańǵa jınap, bilim berý salasyna kúndelikti úles qosyp júrgen ustazdardy kópshilikke tanytýdy kózdeıdi.
— Joba arqyly biz «ustaz» degen ardaqty uǵymnyń artynda naqty adam turǵanyn kórsetkimiz keledi. Onyń óz joly, jınaǵan tájirıbesi, shákirtteriniń damýyna qosqan úlesi bar. Al munyń bári túptep kelgende Qazaqstannyń bilim berý salasynyń damýyna yqpal etedi. Eldiń bolashaǵyn qalyptastyrýda ustazdardyń orny erekshe. Sebebi muǵalimder kún saıyn qabyldaıtyn úlkendi-kishili sheshimderi arqyly bolashaqtyń negizin qalaıdy, — deıdi Aleksandr Savchenko.
Al joba kýratory Perızat Kárimquldyń aıtýynsha, «Bilim beınesi» ustazdardyń ózderin kásibı qyrynan tanytyp, mamandyqqa degen kózqarasy men ómirlik ustanymdaryn bólise alatyn orta bolmaq. Tsıfrlyq galereıada muǵalimderdiń fotosýretteri men ustazdyq ustanymdary jarııalanady.
— Jobanyń basty ereksheligi — galereıanyń mazmunyn muǵalimder ózderi qalyptastyrady. Ár ustazdyń ózindik joly, ustanymy men bilim berý salasyna degen kózqarasy bar. Biz pedagogterdi osy jobaǵa qatysyp, Qazaqstannyń bilim beınesin, muǵalimderdiń ortaq tsıfrlyq galereıasyn jasaýǵa úles qosýǵa shaqyramyz, — deıdi joba kýratory.
Jobaǵa qatysý úshin pedagogterge saıttaǵy arnaıy saýalnamany toltyryp, ustazdyq ustanymyn bólisip, fotosýretin júkteý jetkilikti. Qazirdiń ózinde «Bilim beınesi» tsıfrlyq galereıasynda fotosýreti men kásibı mıssııasyn bólisken alǵashqy qatysýshylardyń jumystary usynylǵan. Jobaǵa ótinimder 2026 jylǵy 5 qazannan 1 jeltoqsanǵa deıin qabyldanady.
Elimizde pedagog mártebesi qalaı ózgerdi, qalaı qorǵalyp jatyr? Bul týraly kásibı merekege oraı Kazinform tilshisi pedagogterge kórsetiletin qoldaý men saladaǵy negizgi ózgerister týraly jazǵan sholýynan oqyńyz.
