Qazaqstanda ustalǵan qyrǵyz depýtaty 12 jylǵa sottalýy múmkin
ALMATY. QazAqparat - Almaty qalalyq qylmystyq ister jónindegi mamandandyrylǵan aýdanaralyq sotynda arnaıy operatsııa barysynda ustalǵan Qyrǵyzstan Jogorký Keneshiniń burynǵy depýtaty Damırbek Asylbekulynyń isi boıynsha jaryssózder ótip jatyr, dep habarlaıdy «QazAqparat» HAA tilshisi.
Sot aldynda Damırbek Asylbekulymen birge taǵy 11 adam jaýap berýde. Olarǵa ekonomıkalyq kontrabanda jasady degen aıyp taǵylýda.
«Damırbek Asylbekulyn QR QK 264-babynyń 1-bóligi, 234-babynyń 3-bóligi boıynsha aıypty dep taýyp, jazasyn qaýipsizdigi joǵary túzeý mekemesinde óteýmen 12 jylǵa bas bostandyǵynan aıyrýdy suraımyn. Jazasyn ótep bolǵan soń elden shyǵarylsyn», - dedi prokýror.
«Japbasovtyqtar» uıymdasqan qylmystyq tobynyń serkesi sanalatyn Esbol Japbasovty memlekettik aıyptaýshy 15 jylǵa bas bostandyǵynan aıyrýdy surady.
Eske salaıyq, aǵymdaǵy jyldyń aqpan aıynda QR Bas prokýratýrasy, QR Ulttyq qaýipsizdik komıteti jáne Sybaılas jemqorlyqqa qarsy is-qımyl ulttyq bıýrosy Almaty, Jambyl, Ońtústik Qazaqstan oblystary men Almaty qalasynda arnaıy operatsııa ótkizip, 30-dan astam adamdy ustady. Olardyń arasynda keden organynyń, shekara qyzmetiniń laýazymdy tulǵalary, brokerler, deldaldar, sondaı-aq uıymdasqan qylmystyq top músheleri bar. Úsheýi Qyrǵyzstan azamaty. Onyń biri - Qyrǵyzstan Jogorký Keneshiniń depýtaty Damırbek Asylbekuly. Keıin anyqtalǵandaı, Damırbek Asylbekulynyń Qazaqstan azamattyǵy bar. Bul rette, sottalýshynyń ózi Qyrǵyzstan azamaty ekenin atap ótýde. Ony qamaýda ustaý merzimi buǵan deıin 8 aıǵa sozylǵan bolatyn.
Málim bolǵandaı, transulttyq uıymdasqan top 2017 jylǵy 1 jeltoqsannan 2018 jylǵy 15 aqpanǵa deıin iri jáne asa iri kólemdegi halyq tutynatyn taýarlardy (jalpy quny 407 558 653 teńge) kontrabandalyq jolmen QHR-dan Qyrǵyzstan arqyly Qazaqstan Respýblıkasyna birneshe márte jetkizgen. Saldarynan EAEO bıýdjetine 99 015 094,2 teńge somasynda kedendik baj salyqtary men mindetti tólemder túspeı qalǵan. Munymen EAEO-ǵa qatysýshy elderge asa iri somada ekonomıkalyq zalal keltirildi. Іs materıaldaryna qaraǵanda, qylmystyq topqa basshylyq jasaǵan Damırbek Asylbekuly onyń músheleriniń árbirine naqty tapsyrmalar berip otyrǵan.
Qylmystyq is 126 tomnan turady. Іs boıynsha Damırbek Asylbekulymen birge taǵy 11 adam sottalyp jatyr, 70 adam kýáger retinde kórsetilgen. Aıta keteıik, sot protsesine Qyrǵyzstan Parlamentiniń músheleri tyńdaýshy retinde qatysty.
