Qazaqstanda ushqyshtardy tekseretin dárigerlerge aıyppul engizý usynyldy
ASTANA. QazAqparat - Qazaqstanda ushqyshtardy tekseretin dárigerlerge aıyppul engizý usynyldy, dep habarlaıdy QazAqparat.
Mundaı norma «Qazaqstan Respýblıkasynyń keıbir zańnamalyq aktilerine áýe keńistigin paıdalaný jáne avıatsııa qyzmeti máseleleri boıynsha ózgerister men tolyqtyrýlar engizý týraly» zań jobasynda eskerilip otyr.
Zań jobasy boıynsha, Ákimshilik quqyq buzýshylyq týraly Kodekske ózgertýler engizý josparlanǵan. Osylaısha, medıtsınalyq tekserý erejelerin saqtamaǵan medıtsınalyq sarapshylardy 100 AEK kóleminde aıyppulmen jazalaý kózdelgen. Eger ol ekinshi ret qaıtalanatyn bolsa, aıyppul kólemi 200 AEK deıin ósedi.
«Atalmysh aıyppul alǵash ret oryn alǵan quqyq buzýshylyq úshin tym kóp. Bul normalar tájirıbege alǵash ret enip otyrǵandyqtan, sonymen qatar ákimshilik zańnamanyń repressıvtiligin tómendetý prıntsıpterine sáıkes, atalmysh aıyppuldy 50 AEK-ke deıin tómendetýdi, al ekinshi ret qaıtalanǵan jaǵdaıda salynatyn aıyppuldy 100 AEK-ke deıin azaıtýdy usynamyn», - dedi jumys tobynyń depýtaty Taras Hıtýov.
Degenmen otyrys barysynda bul usynysqa pikir ekige jaryldy.
«Biz mundaı usynyspen kelispeımiz. Sebebi mundaı normalar qazir barlyq iri memleketterde qoldanylýda, eger medıtsınalyq qyzmetkerler ushqyshqa qatysty zań buzýshylyqtardy jasyrsa, olardy ushyrylymǵa jiberetin bolsa, olarǵa 20 myńnan 250 myńǵa deıin aıyppul salynady, tipti 5 jylǵa deıin bas bostandyǵynan aıyrý jazasy qarastyrylǵan», - dedi QR IDM Azamattyq avıatsııa komıtetiniń tóraǵasy Beken Seıdahmetov.
Onyń málimetterine súıensek, 2014-2016 jyldardyń aralyǵynda ushqyshtardy tekseretin medıtsınalyq qyzmetkerler tarapynan 130 zań buzýshylyq tirkelgen. Onyń basym bóligi - medıtsınalyq tekseristerdiń nátıjelerin jalǵan aqparattarmen almastyrý.
«Qazirgi ýaqytta biz zańda aqparattardy jasyrǵan medıtsınalyq qyzmetkerlerge, ushqyshtarǵa, avıatsııalyq mamandarǵa aıyppul salýdy qarastyratyn normany engizýdi usynamyz», - deıdi ol.
