Qazaqstanda ushqyshsyz ushatyn apparattar shyǵarylýy múmkin

NUR-SULTAN. QazAqparat - «Qazaqstannyń avıatsııalyq ındýstrııasy» JShS ushqyshsyz ushatyn apparattar qurastyratyn óndiris uıymdastyrmaqshy, dep habarlaıdy QR Indýstrııa jáne ınfraqurylymdyq damý mınıstrliginiń baspasóz qyzmeti.

Baspasóz málimetterine qaraǵanda, Qazaqstannyń avıatsııalyq ónerkásipti damytý jáne áýe kemelerin óndirý, tehnıkalyq qyzmet kórsetý jáne jóndeý naryǵyndaǵy básekege qabilettiligin arttyrý maqsatynda qurylǵan «Qazaqstan avıatsııalyq ındýstrııasy» JShS zamanaýı avıatsııalyq kásiporny 2016 jyly paıdalanýǵa berildi.

«Qazaqstan avıatsııalyq ındýstrııasy» JShS aldynda turǵan negizgi mindetterdiń biri - memlekettik avıatsııanyń áýe tehnıkasy jaramdylyǵyn qalpyna keltirý boıynsha memlekettik qorǵanys tapsyrysyn oryndaý. Bul mindetterdi áskerı ushaqtardy paıdalanýda tájirıbesi men daǵdysy bar mamandar, sondaı-aq elimizdiń jáne shetelderdiń beıindi oqý oryndarynda bilim alǵan jas ınjenerler men tehnıkterden turatyn biliktiligi joǵary qyzmetkerler oryndaıdy.

«2018-2020 jyldary Qazaqstan Respýblıkasy aýmaǵynda alǵash ret otandyq kásiporyn An-72, Sý-25 Sý-27, S-295 ushaqtarynda reglamenttik jumystardy oryndady. Sońǵy jyldary kásiporynnyń shtattyq personaly 2 esege, ıaǵnı 200 adamǵa deıin artty. 2020 jyly elimizdiń memlekettik organdaryn qamtamasyz etý úshin tıimdiligi joǵary kópfýnktsıonaldy ushqyshsyz ushatyn apparattardy qurastyratyn óndiristi uıymdastyrý josparlanyp otyr»,-delingen habarlamada.

Sonymen qatar, onda kásiporyn aldynda avıatsııalyq qyzmetterdiń azamattyq naryǵyna, onyń ishinde eksportqa shyǵý maqsaty turǵandyǵy aıtylǵan.

Bul sharalar bolashaqta óńirlik kópfýnktsıonaldy servıstik avıatsııalyq ortalyq mártebesine úmitker bolýǵa múmkindik beredi.