Qazaqstanda ushaqpen saparlaıtyndar sany artty
ASTANA. QazAqparat - 2018 jyldyń 10 aıynda jergilikti áýejaılar 12,7 mln adamǵa qyzmet kórsetti, dep habarlaıdy QazAqparat.
«Bıyl elimizdegi áýe tasymaly salasyndaǵy ósim qarqyny saqtalyp keledi. 2018 jyldyń 10 aıynda jergilikti áýejaılar 12,7 mln adamǵa qyzmet kórsetken. Bul ótken jyldyń sáıkes kezeńimen salystyrǵanda 6 paıyzǵa (12 mln) artyq», - delingen QR IDM málimetinde.
Belgili bolǵandaı, esepti kezeńde Qazaqstan Respýblıkasynyń áýe kompanııalary 6,8 mln jolaýshyny tasymaldady. Ótken jyldyń sáıkes kezeńimen salystyrǵanda áýe kóligimen jolaýshylar tasymalynyń ósimi 10 paıyzdy qurady.
Halyqaralyq áýe kóligi qaýymdastyǵynyń (IATA) baıandamasynda Qazaqstan Shyǵys Eýropa men Ortalyq Azııadaǵy eń serpindi damyp kele jatqan naryqtardyń biri bolyp tanylyp otyr. IATA boljamyna sáıkes, aldaǵy 20 jylda bizdiń elimizdegi áýe kóligimen saparlaýshylar sany 8 mıllıonnan 18 mıllıonǵa deıin artady.
