Qazaqstanda ushaq qyzmetin paıdalanýshylar sany 1 jylda 22 paıyzǵa artqan
Búgin Qazaqstan Respýblıkasynyń Kólik mınıstri Marat Qarabaev avıatsııa salasynyń ókilderin Halaqyralyq azamattyq avıatsııa kúnimen quttyqtady, dep habarlaıdy Kazinform mınıstrliktiń baspasóz qyzmetine silteme jasap.
«Qurmetti áriptester! Halyqaralyq azamattyq avıatsııa kúni qutty bolsyn! Eldegi avıatsııanyń órkendeýi men damýyna qomaqty úles qosyp kele jatqan azamattyq avıatsııa salasy qyzmetkerleriniń qurmetine oraı bekitilgen bul kún Birikken Ulttar Uıymy Bas assambleıasynyń sheshimimen atalyp ótýde. Kásibı mereke halyqaralyq azamattyq avıatsııa jónindegi Konventsııanyń qol qoıylǵanyna 50 jyl tolýyna oraı 1994 jylǵy 7 jeltoqsannan bastap merekelene bastady. Atalǵan konventsııaǵa sáıkes Birikken Ulttar Uıymynyń arnaıy mekemesi Halyqaralyq azamattyq avıatsııa uıymy (IKAO) qurylǵan bolatyn»,-delingen quttyqtaýda.
Merekege oraı mınıstr avıatsııa salasynda jyl basynan beri bolǵan birqatar jetisttike toqtaldy.
Onyń aıtýynsha, jyldyń qorytyndysy boıynsha otandyq áýejaılardaǵy jolaýshylar aǵyny 25 mln-nan astam jolaýshy bolady dep kútilýde, bul ótken jylǵy kórsetkishten 22 paıyzǵa artyq. Іshki tasymaldaý kólemi tolyǵymen qalpyna keltirilip, aptasyna 50 baǵyt boıynsha 640 reısti quraıdy.
Jalpy jyl kóleminde otandyq áýe parki 9 birlik ushaqpen tolyqtyryldy. Áleýmettik mańyzy bar baǵyttardyń kóliktik qoljetimdiligin arttyrý maqsatynda 7 oblystaǵy 23 ishki áýe marshrýty sýbsıdııalanady.
Búgingi tańda Qazaqstan 28 elmen halyqaralyq áýe qatynasyn ornatqan. Onyń ishinde, bıyl 13 elge aptasyna 57 reıs jıiligimen 23 baǵyt boıynsha jańa reıster ashylyp, qaıta iske qosyldy. Ushý qaýipsizdigin qamtamasyz etýdiń qol jetkizilgen deńgeıin odan ári jetildirý jáne óńirlik yntymaqtastyqty nyǵaıtý boıynsha jumystar jalǵasýda.
Áýe kóligi ınfraqurylymyn jańǵyrtý sheńberinde elimiz boıynsha 4 nysanda tıisti jumystar júrgizilýde. Jeke ınvestıtsııalar esebinen Almaty, Shymkent jáne Qyzylorda áýejaılarynda jańa jolaýshylar termınaldarynyń qurylysy júrip jatyr. Sonymen qatar Qostanaı áýejaıynda aerovokzaldy teleskopııalyq trap qurylǵysymen qamtý syndy qaıta jańartý jumystary máresine jetýge daıyn. Joǵaryda kórsetilgen ınfraqurylymdyq jobalardy iske asyrý jolaýshylar tasymalynyń ótkizý qabiletin arttyra túsetini anyq.
Álemdik tájirıbe negizinde elimizdiń 6 áýejaıynda (Astana, Almaty, Shymkent, Aqtaý, Aqtóbe jáne Qaraǵandy) arnaıy ekonomıkalyq aımaqtar rejımin engizý usynylady. Budan basqa, Jet A-1 avıatsııalyq otyn standarttaryna kóshý boıynsha ınfraqurylymdy daıyndaý máselesi pysyqtalýda.
«Jalpy jyl kóleminde atqarylǵan nátıjeli jumys kólemi az emes. Osy ataýly kúni salanyń barlyq qyzmetkerin quttyqtaı otyryp, salaǵa qosqan úlesteri úshin alǵys aıtamyn. Avıatsııa óte kúrdeli sala, sonysymen de qyzyq. Atalǵan salada kásibıligi men jaýapkershiligi joǵary mamandar eńbek etedi. Azamattyq avıatsııa salasy qyzmetkerlerin kásibı merekemen quttyqtaı otyryp, myqty densaýlyq, otbasylaryńyzǵa amandyq, kásibı jetistikter tileımin!»,-delingen mınıstrdiń quttyqtaýynda.
