Qazaqstanda úsh jylda 800-den astam densaýlyq saqtaý nysany salyndy
ASTANA. KAZINFORM – Qazaqstanda sońǵy úsh jylda densaýlyq saqtaý ınfraqurylymyn jańǵyrtý aıasynda 800-den astam medıtsınalyq nysan paıdalanýǵa berildi. Bul týraly Densaýlyq saqtaý mınıstrligi habarlady.
Vedomstvo málimetinshe, 2023–2025 jyldar aralyǵynda elimizde 813 densaýlyq saqtaý nysany salynǵan. Onyń 655-i aýyldyq jerlerdegi alǵashqy medıtsınalyq-sanıtarııalyq kómek kórsetý uıymdaryna tıesili.
Aýyldyq densaýlyq saqtaý júıesin damytý memlekettik saıasattyń negizgi basymdyqtarynyń biri bolyp qala beredi. Sonyń nátıjesinde buryn medıtsınalyq kómek kórsetilmegen eldi mekenderde 200-den astam jańa nysan ashylyp, shamamen bir mıllıon aýyl turǵyny medıtsınalyq qyzmetke qol jetkizdi.
– Sońǵy úsh jylda densaýlyq saqtaý salasynyń negizgi kapıtalyna salynǵan ınvestıtsııalar kólemi 22%-ǵa ósip, 436 mlrd teńgeden 561 mlrd teńgege jetti. Al 2025 jyldyń qorytyndysy boıynsha jeke ınvestıtsııalar kólemi 137 mlrd teńgeni qurady, – dep málimdedi Densaýlyq saqtaý mınıstrligi.
Saladaǵy iri ınfraqurylymdyq jobalar qatarynda Astanadaǵy Ulttyq ǵylymı onkologııa ortalyǵy men Ulttyq shuǵyl medıtsına úılestirý ortalyǵy, sondaı-aq Almatydaǵy Ulttyq ǵylymı ınfektsııalyq aýrýlar ortalyǵy bar.
Mınıstrlik málimetinshe, qazirgi ýaqytta aýdandyq aýrýhanalardy jańǵyrtý jumystary jalǵasyp jatyr. 2026 jyldyń sońyna deıin 32 aýdandyq ortalyq aýrýhanany kópbeıindi aýdandyq aýrýhana deńgeıine jetkizý josparlanǵan. Sonymen qatar medıtsınalyq uıymdar kompıýterlik tomograftar, angıograftar jáne basqa da zamanaýı jabdyqtarmen qamtamasyz etilýde.
– Qabyldanyp jatqan sharalar shuǵyl medıtsınalyq kómektiń qoljetimdiligin arttyryp, ınsýlt pen ınfarkttan bolatyn ólim-jitimdi shamamen 20%-ǵa tómendetýge múmkindik beredi dep kútilýde, – delingen habarlamada.
Ana men bala densaýlyǵyn qorǵaý baǵytynda da aýqymdy jumystar qolǵa alynǵan. 2029 jylǵa deıin elimizde toǵyz zamanaýı perınataldyq ortalyqtan turatyn jeli qalyptastyrý josparlanǵan. Qazirgi ýaqytta Astanada jańa perınataldyq ortalyq salynyp jatyr, al Shymkentte, Qaskeleńde, Qaraǵandyda jáne Túrkistan oblysynyń Temirlan aýylynda jobalaý jumystary aıaqtalǵan.
Sonymen qatar halyqaralyq qarjy uıymdarynyń qatysýymen 10 kópbeıindi balalar statsıonaryn salý máselesi qarastyrylyp jatyr. Memlekettik-jekeshelik áriptestik aıasynda Almaty, Kókshetaý jáne Qosshy qalalarynda kópbeıindi aýrýhanalar, al Shymkentte ýnıversıtettik aýrýhana jobalary júzege asyrylýda.
– Búginde barlyq jańa medıtsınalyq nysandar densaýlyq saqtaý salasynyń jańartylǵan qurylys standarttaryna jáne halyqaralyq JCI men iHFG talaptaryna sáıkes salynyp jatyr. Bul zamanaýı tehnologııalarmen jabdyqtalǵan, qaýipsiz ári tıimdi medıtsınalyq mekemeler qurýǵa múmkindik beredi, – dep atap ótti mınıstrlik.
Aıta keteıik, dárilik zattardy basqarýda jańa tehnologııalar engizilip jatyr.
