Qazaqstanda úsh jańa orden paıda boldy: Marapat talaptary qandaı
ASTANA. KAZINFORM – Májilis Prezıdent tapsyrmasyn iske asyrý úshin ázirlengen «QR memlekettik nagradalary týraly» zańǵa túzetýlerdi qabyldady. Zań aıasynda «AL-FARABI», «QOJA AHMET YASAUI» jáne «Meıirim» ordenderin taǵaıyndaý jáne marapattaý tártibin ózgertý jónindegi normalar qarastyrylǵan.
Memleket basshysy 2025 jyldyń 5 jeltoqsanynda «Altyn sapa» jáne «Paryz» syılyqtarynyń laýreattaryn marapattaý rásiminde «Meıirim» ordenin taǵaıyndaý týraly jáne 2026 jyly 21 naýryzda Túrkistan oblysynyń turǵyndarymen kezdesýde «QOJA AHMET YASAUI» ordenin taǵaıyndaý týraly, sondaı aq 2026 jyly 11 sáýirinde ǵalymdardy marapattaý rásiminde «AL-FARABI» ordenin taǵaıyndaý týraly tapsyrma bergen bolatyn.
Ǵylym jáne joǵary bilim vıtse-mınıstri Gúlzat Kóbenova jańa ordenderdi berý arnaıy bekitiletin erejelerge sáıkes júrgiziletinin aıtty.
– Bul ordenderdi marapattaý erejege sáıkes júzege asyrylady. Ýákiletti organ men Úkimet tarapynan Memleket basshysyna usynystar engiziledi. Bilim, ǵylym, mádenıet jáne rýhanı ómir salasynda erekshe eńbek sińirgen azamattar qarastyrylyp, úmitkerlerdiń eńbek ótili, ǵylym salasyndaǵy jetistikteri, tárbıelegen shákirtteri men el damýyna qosqan úlesi jan-jaqty saralanyp, tıisti usynystar beriledi, - dedi vıtse-mınıstr.
Onyń aıtýynsha, «AL-FARABI» ordeni ǵylymı qaýymdastyq úshin mańyzdy qoldaý bolmaq.
– Álemdik tájirıbede dál osyndaı orden kóp kezdespeıdi. Gýmanıtarlyq salaǵa arnalǵan uqsas marapat Iran elinde bar. Sondyqtan bul bastama biz úshin de, ǵalymdar úshin de úlken qoldaý, - dedi Gúlzat Kóbenova.
«QOJA AHMET YASAUI» ordenimen Qazaqstan Respýblıkasynyń damýyna erekshe eńbek sińirgen otandyq jáne sheteldik ǵalymdar, memleket jáne qoǵam qaıratkerleri, sondaı-aq memlekettikti nyǵaıtýǵa, qoǵamdyq-saıası, áleýmettik, aǵartýshylyq, mádenı jáne gýmanıtarlyq salalardy damytýǵa úles qosqan azamattar nagradtalady.
Al «Meıirim» ordenimen joǵary áleýmettik jaýapkershilik tanytqan, qaıyrymdylyq qyzmetke, onyń ishinde metsenattyq nemese fılantropııalyq qyzmetke qomaqty úles qosqan azamattar nagradtalady.
Zań jobasynda «Erekshe jaǵdaılarda aıryqsha kózge túskeni úshin Memleket basshysynyń sheshimimen «Meıirim» ordenimen nagradtaý belgilengen merzimder eskerilmeı júrgizilýi múmkin..» dep jazylǵan.
Buǵan deıin Májiliste «QR keıbir zańnamalyq aktilerine pedagog mártebesi jáne bilim berý máseleleri boıynsha ózgerister men tolyqtyrýlar engizý týraly» zań jobasy qabyldanyp, Senatqa jiberildi.
