Qazaqstanda úsh qylmystyq toptyń joly kesildi

NUR-SULTAN. QazAqparat - QR Ulttyq qaýipsizdik komıteti Іshki ister mınıstrligimen birlesip, «A» jáne «Búrkit» arnaıy bólimshelerin tarta otyryp, astana tóńireginde jurtty qorqytyp, reıderlikpen jáne qarý saýdasymen aınalysqan «Álibekovter», «Ibragımovter» jáne «Mahmýdovtar» uıymdasqan qylmystyq tobynyń asa qaýipti áreketiniń jolyn kesti, dep habarlaıdy QR UQK baspasóz qyzmeti.

Nur-Sultan, Almaty, Aqtóbe jáne Qostanaı qalalaryndaǵy arnaıy operatsııa sheńberinde atalǵan toptardyń 15 jetekshisi men belsendi músheleri ustaldy, olardyń bireýi Reseı Federatsııasynda bandıtızm men adam óltirgeni úshin halyqaralyq izdestirýde bolatyn. Atys qarýynyń, oq-dáriler men granatalardyń arsenaly alyndy.

Ustalǵandar Nur-Sultan qalasy Polıtsııa departamentiniń ýaqytsha ustaý ızolıatoryna qamalyp, qolda bar dáleldemelerdi bekitý jáne qylmystyq árekettiń ózge de epızodtaryn anyqtaý boıynsha tergeý is-sharalary júrgizilýde.

Karantındik shekteýler jaǵdaıynda qylmystyq toptar ózderiniń qylmystyq belsendiligin tómendetpeı, ekonomıkalyq qıyndyqqa tap bolǵan kásipkerlerden qorqytyp alýmen jáne reıderlikpen aınalysýdy jalǵastyrǵan.

Bótenniń múlkin alyp qoıý kezinde olar atys qarýy men dene kúshin qoldaný arqyly dórekilik pen qatygezdik tanytqan.

Osy jaǵdaılarda el basshylyǵy quzyretti organdar úshin beıbit azamattarǵa bandıttik elementter tarapynan qaýip-qaterlerdi joıý, qoǵamnyń 90-jyldardaǵy «reketırlikke» qaraı quldyraýyna jol bermeý boıynsha mindetterdi basymdylyqtar qataryna qoıyp otyr.

Arnaýly qyzmetter men polıtsııanyń qylmystyq toptardyń josparlary men nıetterin anyqtaý jáne onyń jolyn kesý boıynsha júıeli jumysy jalǵasýda.