Qazaqstanda úsh qala ákimdikteriniń quzyreti keńeıedi

NUR-SULTAN. QazAqparat – Nur-Sultan, Almaty men Shymkent qalasy ákimdikteriniń quzyreti keńeıtiledi. Bul týraly QazAqparat Ulttyq ekonomıka mınıstrliginiń baspasóz qyzmetine silteme jasap habarlaıdy.

2019 jylǵy 27 jeltoqsanda Memleket basshysy Qasym-Jomart Toqaev «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń ákimshilik-aýmaqtyq qurylysy, memlekettik basqarý júıesin jáne bıýdjetaralyq qatynastardy jetildirý, kredıtteý jáne bilim berý máseleleri boıynsha ózgerister men tolyqtyrýlar engizý týraly» Zańǵa qol qoıdy.

Zań sheńberinde Nur-Sultan, Almaty men Shymkent qalalary ákimdikteriniń, onyń ishinde basqarylatyn ýrbanızatsııa sheńberinde qala qurylysy saıasaty, kólik ınfraqurylymy, sáýlet kelbeti salasyndaǵy quzyretin keńeıtý boıynsha túzetýler engizildi.

«6 zańǵa (Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly», «Qazaqstan Respýblıkasy astanasynyń mártebesi týraly», «Almaty qalasynyń erekshe mártebesi týraly», «Qazaqstan Respýblıkasynyń Sáýlet, qala qurylysy jáne qurylys qyzmeti týraly», «Turǵyn úı qatynastary týraly», «Memlekettik múlik týraly» zańdar) ózgerister men tolyqtyrýlar engizilgen. Bular respýblıkalyq mańyzy bar qalalar men astanany damytýdyń ózekti máselelerin sheshýge múmkindik beretin aıtylǵan qalalardyń tirshiligin qamtamasyz etý men damytýdaǵy jekelegen máselelerdi retteý boıynsha ózgedeı tártipti ornatýǵa baǵyttalǵan» , - delingen mınıstrlik taratqan habarlamada.