Qazaqstanda úsh aıda 9,3 mln adam jumyspen qamtyldy

ASTANA. KAZINFORM – Bıylǵy ekinshi toqsanda Qazaqstan ekonomıkasynda 9 mln 300,4 myń adam jumyspen qamtyldy, dep habarlaıdy Ulttyq statıstıka bıýrosy.

Olardyń ishinde 7,14 mln adam nemese 76,8%-y – jaldamaly jumysshylar, 2,16 mln adam nemese 23,2%-y – óz betinshe jumyspen qamtylǵandar.

- Jumyspen qamtý deńgeıi 15 jastan asqan jalpy halyqqa shaqqanda 64,6%-dy, jumys kúshiniń sanyna shaqqanda 95,4%-dy qurady. Ótken jyldyń sáıkes kezeńimen salystyrǵanda jumyspen qamtylǵandar sany 110 myń adamǵa artty, onyń basym bóligi jaldamaly jumysshylar esebinen boldy, - delingen aqparatta.

Jumyspen qamtylǵandardyń eń kóp úlesi myna salalarda tirkeldi:

• saýda – 17,1%;

• bilim berý – 13,1%;

• ónerkásip – 12,5%;

• aýyl sharýashylyǵy – 10,8%;

• kólik jáne qoıma – 7,3%;

• qurylys – 6,9%;

• densaýlyq saqtaý – 6,4%.

Bir jumysshyǵa shaqqandaǵy jumys aptasynyń ortasha uzaqtyǵy 39 saǵatty qurady. Onyń ishinde jaldamaly jumysshylar – 40 saǵat, óz betinshe jumyspen qamtylǵandar 36 saǵat jumys istegen.

Aıta keteıik, Qazaqstanda mektepke deıingi bilim berýde 330 quzyrettilik ortalyǵy jumys isteıdi.