Qazaqstanda úsh aıda 74,8 mln memlekettik qyzmet kórsetilgen
ASTANA. KAZINFORM – QR Memlekettik qyzmet isteri agenttigi janyndaǵy Qoǵamdyq keńes músheleri Astana qalasyndaǵy №1 mamandandyrylǵan halyqqa qyzmet kórsetý ortalyǵynyń jumysyna qoǵamdyq monıtorıng júrgizdi.
Monıtorıngtiń negizgi maqsaty memlekettik qyzmetterdiń kórsetilý barysymen tanysý, azamattarǵa qyzmet kórsetýdiń qoljetimdiligi men tıimdiligin baǵalaý, sondaı-aq qyzmetterdiń elektrondyq formatta usynylý úderisine qoǵamdyq baqylaý júrgizý boldy.
Іs-shara barysynda Qoǵamdyq keńes músheleri ótinishterdi qabyldaý jáne daıyn qujattardy berý tártibimen, «bir tereze» qaǵıdaty boıynsha qyzmet kórsetý tetikterimen, qyzmet kórsetý zaldarynyń jumysymen jáne azamattarǵa tsıfrlyq qyzmetterdi usyný tájirıbesimen tanysty.
«Azamattarǵa arnalǵan úkimet» memlekettik korporatsııasy ókilderiniń málimetinshe, 2026 jyldyń birinshi toqsanynda azamattarǵa 74,8 mıllıonnan astam memlekettik qyzmet kórsetilgen. Onyń ishinde ortalyq memlekettik organdar arqyly 54,9 mıllıonnan astam, jergilikti atqarýshy organdar arqyly 19,9 mıllıonnan astam qyzmet usynyldy. Al Memlekettik korporatsııa arqyly 3,9 mıllıon memlekettik qyzmet kórsetilgen.
Qazirgi ýaqytta halyqqa qyzmet kórsetý ortalyqtary arqyly eń kóp suranysqa ıe qyzmetterdiń qatarynda jeke basty kýálandyratyn qujattardy rásimdeý jáne aýystyrý, kólik quraldaryn tirkeý jáne esepten shyǵarý, júrgizýshi kýálikterin berý, jyljymaıtyn múlikke quqyqtardy memlekettik tirkeý jáne basqa da áleýmettik mańyzy joǵary qyzmetter bar.
«2026 jyldyń birinshi toqsanynda azamattarǵa 74,8 mıllıonnan astam memlekettik qyzmet kórsetildi. Qoǵamdyq monıtorıngtiń maqsaty – qyzmet kórsetý sapasyn baǵalap qana qoımaı, azamattardyń memlekettik qyzmetterge qoljetimdiligin arttyrýǵa yqpal etý. Bul baǵyttaǵy jumystar turaqty negizde jalǵasady», – dep atap ótti is-sharaǵa qatysýshylar.
Monıtorıng barysynda halyqqa qyzmet kórsetý ortalyǵy qyzmetkerlerine «Memlekettik qyzmet týraly» jańa zańnyń negizgi jańashyldyqtary túsindirildi. Atap aıtqanda, azamattarǵa qyzmet kórsetý kezinde klıentke baǵdarlanǵan minez-qulyq modelin ustaný, ótinishterdi qaraý barysynda formaldy negizder boıynsha negizsiz bas tartýǵa jol bermeý jáne memlekettik qyzmetterdi sapaly ári tıimdi kórsetý qaǵıdattaryn saqtaý máselelerine erekshe nazar aýdaryldy.
Memlekettik qyzmet isteri agenttiginiń málimetinshe, memlekettik qyzmetterdiń sapasyn qamtamasyz etý jáne azamattardyń quqyqtaryn qorǵaý máseleleri turaqty baqylaýda. Osy baǵyttaǵy jumystar aıasynda áleýmettik jeliler men buqaralyq aqparat quraldarynda jarııalanatyn azamattardyń pikirleri men ótinishteri júıeli túrde zerdelenip otyrady.
Máselen, Aqtaý, Almaty jáne Shymkent qalalaryndaǵy halyqqa qyzmet kórsetý ortalyqtarynyń jumysyna qatysty jarııalanǵan synı materıaldar men azamattardyń shaǵymdaryna taldaý júrgizilip, anyqtalǵan kemshilikterdi joıý boıynsha tıisti sharalar qabyldanǵan.
Qoǵamdyq monıtorıng qorytyndysy boıynsha Qoǵamdyq keńes músheleri «Azamattarǵa arnalǵan úkimet» memlekettik korporatsııasyna memlekettik qyzmet kórsetý sapasyn odan ári arttyrý, azamattarǵa qolaıly jaǵdaı jasaý jáne qyzmet kórsetý úderisterin jetildirý baǵytynda birqatar usynys engizdi.
Aıta keteıik, Atyraýda HQO-da quqyq qorǵaý organdary tergeý júrgizip jatyr.
